Barikuan hasiko dira Komedia Gauak
Komedia Gauak egitasmoa bihar [martxoak 7] hasiko da, 21:30ean, Kult Parnasoa kulturgunean. Joxek Farra, Lander Varona, Esti Curiel eta Amaia Ruiz de Galarreta oholtzaratuko dira, Asier Galarza muxikarraren eta Jokin Ansotegi gernika-lumotarraren gidaritzapean.
Gernika-Lumoko Kult Parnasoa kulturguneak Komedia Gauak bakarrizketa zikloaren lehendabiziko hitzordua hartuko du, asteburua iristeagaz batera. Bihar [martxoak 7], 21:30ean hasita, lau bakarrizketalari taularatuko dira, bertaratzen direnei aurpegian irribarre bat marraztu asmoz. Antolatzaileek azaldu dutenaren arabera, bakarrizketak edo stand-up saioak Euskal Herri osoan “puri-purian” daude, eta bolada horri tiraka atondu dute egitasmoa. Probalekuari dagokionez, “toki iluna eta epela” bilatu dute: “Umore beltza eta denetariko estiloak jorratzeko plaza egokia da, xarma propioa duena eta umorezko bakarrizketetarako baldintza aproposak uztartzen dituena; oholtza baxua du, ikusleekiko hurbila, eta lantalde ederra dago bertan”.
Euskal Herriaren luze-zabaleko lau protagonista taularatuko dira lehen saioan: Joxek Farra, Lander Varona, Esti Curiel eta Amaia Ruiz de Galarreta. Bestelako ibilbideak dituzten umoregileak izanik, ikuskizun anitza dago aurreikusita. Parte hartzaile bakoitzak 10-15 minutu inguruko tartea edukiko duela iragarri dute; bitarteetan, ostera, Asier Galarza muxikarra eta Jokin Ansotegi gernika-lumotarra arduratuko dira gidaritza eta dinamizazio lanak egiteaz. Biak ala biak azalduko dira lehenik, bost minutu inguruko sarrera egiteko. Bakarrizketen bitartean, berriz, hurrengo partaidea aurkeztuko dute, betiere umorearen klabeari jarraiki. Gidariek nabarmendu dute bakarrizketalari bakoitzak “jatorri, ibilbide eta estilo propioak” dituela eta, horrenbestez, nork bere ñabardura emango diola saioari.
Sarrerak aurretiaz Internet bidez eskuratu daitezke; bihar bertan ere Kultu Parnasoan salgai egongo dira, edukiera bete arte
Sarrerak aurretiaz Internet bidez erosteko aukera dago jadanik eta, agortzen ez badira, bihar Kult Parnasoan bertan (Ibarra kalea 19, 16. lokala) eskuratu ahalko dira, 10 euroren truke. Aurreratu dute 100 sarrera egongo direla salgai, ikusleak jesarrita egon beharko direla, eta barra zabalik egongo dela. Era berean, aurrerantzean beste hiru saio egingo dituzte, apurka-apurka argitara ematen joango direnak. Umoregile desberdinak bertaratzea eta denetariko moldeak plazaratzea dute jomuga.
