Ozeanoen Europako Itunaren zutabe estrategikoak "arrantza jasangarria eta arduratsua" izatea eskatu du BTWCek
Ozeanoen Europako Ituna definitzeko Europako Batzordearen entzute-prozesuan parte hartu du Bermeo Tuna World Capital elkarteak, eta ituna garatu eta arrantza jasangarria "maila globalean" sustatzeko batzordearekin lankidetzan aritzeko prest daudela berretsi dute.
BTWC elkarteak Europako Batzordearen entzute-prozesuan parte hartu duBermeo Tuna World Capital Bermeo Tuna World Capital elkarteak (BTWC) Ozeanoen Europako Ituna definitzeko Europako Batzordearen entzute-prozesuan parte hartu du, bere ekarpena eginez. Hala, atunaren balio-katea ordezkatzen duen, eta arrantzan iraunkortasuna sustatzen duen erakundeak itunaren zutabe estrategia “arrantza jasangarria eta arduratsua” izatea eskatu zuen, horren dimentsio ekonomikoa, soziala eta ingurumenekoa integratzeagaz batera.
“Jarduera edo erabaki bat aldi berean ingurumen, gizarte eta ekonomia aldetik jasangarria ez bada, ez da jasangarria”, adierazi du Maitane Leizaola BTWCko zuzendariak. Bide horretan, elkartetik nabarmendu dute arrantza jasangarria “itsasoko kontserbazio-motorra” eta elikagaien segurtasunerako eta kostaldeko komunitateen garapenerako “funtsezko elementua” dela. Era berean, garrantzitsutzat jo dute zientzian oinarritutako printzipioak aplikatzea, balio-katean “trazabilitatea eta gardentasuna bermatzea”, eta nazioarteko aliantzak indartzea, arrantza-kudeaketa “arduratsua” izan dadin. Hala, 2030 Agenda atunaren industrian integratzearen eta “kostaldeko komunitateak ahalduntzearen alde” agertu dira.
Kudeaketa arduratsua.
Modu berean, Europar Batasunak hirugarren herrialdeetako arrantza-produktuek Europan eskatzen diren ingurumen eta gizarte estandar berdinak betetzen dituztela bermatzeko mekanismoak hartzea ere eskatzen du: “Ezin dugu onartu iraunkortasuna lehiarako oztopo bihurtzea arauak betetzen dituzten Europako enpresentzat. Nazioarteko merkataritzan bidezko baldintzak bermatu behar dira”, azaldu dute.
“Bermeon dugun ereduak erakusten du gobernuen, zientzialarien, sektore pribatuaren eta gizarte zibilaren arteko lankidetza funtsezkoa dela ozeanoen kudeaketa arduratsua egiteko”, azaldu dute erakundetik. Horretarako, Ozeanoen Europako Itun bat diseinatzeko eskatu dio BTWCk Europako Batzordeari, arrantzalekin, kostaldeko komunitateekin eta jasangarritasunarekin konprometitutako elkarteen ahotsa barne hartzen duena. Era berean, batzordearekin lankidetzan aritzeko prest daudela berretsi dute, ituna garatu eta arrantza jasangarria “maila globalean” sustatzeko.
Oparotasuna bermatzea.
Von der Leyen Europako Batzordeko presidenteak Ozeanoen Europako Ituna, hurrengo batzordearen (2024-2029) jarraibide politikoen barnean. Horren helburua ozeanoekin zerikusia duten Europar Batasuneko “esparru politiko guztien artean koherentzia eskaintzea” izango da, ekonomia urdina sustatuz, ozeanoen “kudeaketa iraunkorra sustatzea eta ozeanoen osasuna, erresilientzia eta produktibitatea” bermatzeagaz batera: “Hau da, kostaldeko komunitateen oparotasuna bermatzea”.
