Ia 300 mendizale, Ibarruriko Mendi Martxarako prest
Domekan [martxoak 2] egingo dute XII. Ibarruriko Mendi Martxa. 280 parte hartzaile inguruk aurretiaz izena eman dute, eta egunean bertan animatzeko aukera ere egongo da.
Ibarruri inguruko baso eta mendiak zain daude. Domekan [martxoak 2] egingo dute Ibarruriko Mendi Martxaren XII. aldia, martxa luze, labur eta mendi lasterketagaz. Internet bidezko aurretiazko izen emateak ia 300 laguneko parte hartzea utzi du, eta egunean bertan izena emateko aukera ere egongo da, proba bakoitza orduko. Saltsamendi Kultur Taldeko antolakuntzak aditzera eman duenez, aurtengo aurretiazko izen ematea, 280 lagun ingurukoa, beste urte batzuetakoa baino “apalagoa” da, baina, edozelan ere, egunean bertan “haziko den” jakitun dira: “Mendizale askok egunean bertan erabaki ohi dute parte hartzea, eguraldiaren arabera”. Hori horrela, herritarrei parte hartzera animatzeko deialdia luzatu diete.
Urtero legez, hiru aukera edukiko dituzte mendizaleek. Martxa luzeak eta mendi lasterketa eta martxa laburra. Gaur-gaurkoz, martxa luzeak dauka parte hartzerik handiena, 150 lagun ingurukoa; lasterketara 60 bat korrikalari animatu dira; martxa laburrera, 70 martxalari inguru. Banaketa hori “aurreikusten zutela” adierazi dute antolatzaileek: “Azken urteotako dinamikei erantzuten die”. Egunean bertan, 07:30etik 08:15era bitartean martxa luzerako izena emateko aukera egongo da, 08:30ean irteera hartu orduko. Lasterkariak 10:00etan hasiko dira korrika, eta bai dortsalak batzeko, bai izena emateko, 08:30ak eta 09:30ak bitarteko tartea edukiko dute; aukera laburreko martxalariek, berriz, 10:15ean ekingo diote bideari, eta 09:30etatik 10:00ak arteko tartea edukiko dute, izena emateko.
Bestalde, eguraldia lagun, umeentzako jolasgunea antolatuko dute antolatzaileek, irteera eta helmuga eremua hartuko dituen Ibarruriko plazan. Behin probak amaituta, gainera, parte hartzaileen jan-edanean eta jai giroan geratzeko aukera edukiko dutela adierazi dute. Aurretiaz izena emandako partaideek kamsieta jasoko dute opari. Egunean bertan animatzen direnek, aldiz, “botila edo txapela” eskuratu ahalko dituzte.
