Bidebusa: milioi bat bidaiaritik gora, 15 urteko bidean
2010. urtean hasi ziren biraka Gernika-Lumoko Bidebusaren gurpilak eta, orduz geroztik, zerbitzuaren erabilerak gora eta gora besterik ez du egin. Hamabost urteko tartean, 1.097.069 herritarrek erabili dute doako autobus zerbitzu hori. Gernika-Lumoko Udaletik adierazi dute kopuru horrek gernika-lumotarrek urtez urte beharrizanetara doitzen eta moldatzen joan den garraiobidearekiko “fideltasuna” bistaratzen duela.
Abian ipini zenetik, Bidebusak bere ordutegiak eta ibilbideak egokitu egin ditu, udalerriaren ingurunerik urrunekoenetara iristeko eta herriguneko irisgarritasuna bermatzeko. Joan-etorriko ibilbide zirkularrekin, Bidebusak astelehenetik zapatura bitarteko zerbitzua ematen die herritarrei, hala goizez (08:10etik 13:30era), nola arratsaldez (16:45etik 19:30era). Horrez gain, Bidebus Txikia izeneko zerbitzua ere badago; urrutien dauden auzuneetako (esate baterako, Zallo, Arane eta Lumoko) herritarrei zuzenduta dago, aurretiaz erreserba eginda.
Urteek erakutsitakoa.
Bestalde, udaletik adierazi dute urtez urteko estatistikek erakusten dutela herritarrek begi onez hartzen dutela Bidebus zerbitzua. Izan ere, 2023. urtean, 82.823 bidaiarik erabili zuten; maiatzeko (8.633) eta ekaineko (8.612) gailurrekin. 2024an, tendentziek goranzko joeragaz jarraitu zuten: 83.670 bidaide. Urte horretan ere, maiatza (8.601) eta ekaina (8.590) izan ziren erabilera tasarik esanguratsuenak eduki zituzten hilabeteak.
Edozelan ere, argitu dute zerbitzu horrek jarraipen aldetik edukitako urterik azpimarragarriena 2012a izan zela (84,553 erabiltzaile), 2018aren (83.019) eta 2019aren (84.043) aurretik. Udal ordezkariek nabarmendu dute Bidebusa hainbat herritarren mugikortasun “eroso, erraz eta funtsezkoa” bermatzen duen zerbitzua dela, “batez ere, adinekoena nahiz ikasleena”.
