Mundakako aratusteen azala
Marimar Agirreren kartela da Mundako inauteriak iragartzeko aukeratu dutena, kartel lehiaketa irabazi ostean.
Ezkerrean, Mundakako alkate Sorne Rubio; eskuman, kartelaren egile Marimar Agirre. Mundakarrak inauterien jai giroan bete-betean murgilduta daude. Otsailaren 2a eta martxoaren 4a bitartean, aratusteekin erlazionaturiko denetariko ekimenak eduki dituzte udalerrian, eta egunik esanguratsuenak heltzear daude, gainera. Aurtengo aratusteak zein azalek iragarriko dituzten ere aditzera eman dute udaletik. Izan ere, Marimar Agirre herritarrak ondutako kartela hautatu dute kartel lehiaketaren irabazle.
Agirrek kolore gorria hartu du ardatz, eta kartelean bistaratu ditu herriko aratusteen ikur nagusi diren bi pertsonaiak: Atorrak eta Laminak. Era berean, keinu argiak egin dizkio jaiok inguratzen dituen aldarte musikalari: kartelean musika noten zeinuak ikus daitezke.
Otsailaren 2ko Aintzinako Aratuste Egunak eman zien hasiera ospakizunei. Hori bai, egun nagusia, Laminak eta Atorrak kaleratzen direna, datorren domeka [martxoak 2] izango da. Edozelan ere, zapatuan [martxoak 1], astelehenean [martxoak 3] eta martitzenean [martxoak 4] ere egongo da zer egin, zer ikusi eta zertaz gozatu Mundakan.
