Birziklapena "aurrera" doa Gernika-Lumon
2024ko datuen arabera, %32ko bilketa erregistratu da Gernika-Lumon. "Hondakinak gutxitu eta materialak gehiago berreskuratu" direla azpimarratu du udalak, hain zuzen.
Birziklapenak eragina izaten jarraitzen du gernika-lumotarren artean; hala ziurtatzen dute 2024an hondakinen bilketari buruz Ingurumen sailak eskainitako datuek. Balantze ofizialaren arabera, Gernika-Lumoko Udalak aditzera eman duenez, etxeko eta merkataritzako hondakinen bilketa %4 jaitsi da aurreko urtearekin alderatuta, eta guztira 6.255.831 kilo bildu dira. Gainera, guztira 277.434 kilo hondakin gutxiago sortu dira, biztanleko eta eguneko 1,02 kiloko ratioan kokatuz. Horrela, orain arte erregistratutako urteetako sorkuntza-kopururik txikiena izanik. “Horrek agerian uzten du herritarrek kontzientzia handiagoa dutela hondakinak kudeatzeari dagokionez, hondakinik onena sortzen ez dena baita”, goraipatu dute udal gobernuko kideek.
Datu nabarmenetako bat altzarien bilketaren gorakada dela nabarmendu dute, hain zuzen ere. 2023an 167.770 kilo jasotzetik 2024an 190.800 jasotzera igaro da, hau da, %13,7ko hazkundea izan du. Obretako hondakin geldoen bilketa ere nabarmen jaitsi da, gainera; 2023an 218.820 kilo izatetik 43.960 kilo izatera pasa da azken ekitaldian, %79,9ko murrizketa.
“Zuraren birziklapenak %18,4ko igoera izan du: 2023an 84.040 kilo birziklatu ziren, eta 2024an 99.540. Paperaren eta kartoiaren bilketa, berriz, 321.459 kilo jaitsi da; aurreko urtean, berriz, 343.272 kilo gutxiago bildu ziren. Arrain-hondakinen sorrera ere jaitsi egin da, % 9,3 murriztu baita (49.300 kilotik 44.700era 2023an), baita janari-hondakinena ere, 170.380 kilotik 154.066ra, hau da, % 9,5 jaitsi da”, gaineratu dute, halaber.
Balorazio positiboa.
Errefusa (jatorrian bereizi gabeko hondakinak) ere nabarmen jaitsi da, eta horrela jakinarazi du udal gobernuak, bide batez: “2023an 4.290.868 kilo izatetik 2024an 4.242.996 kilo izatera pasatu da, hau da, % 1,1 gutxiago. Etxeko olioari dagokionez, %30eko jaitsiera izan da: 2024an 8.204 litro bota ziren, aurreko urtean 11.854”.
Jon Lejarraga Ingurumen zinegotziak “positiboki” baloratu ditu kopuru horiek, herrian ingurumen erantzukizun handiagoa izateko joera azpimarratuz: “Datu horiek Gernika-Lumoko herritarrek birziklatze eta iraunkortasunarekin duten konpromisoa islatzen dute. Hondakin gutxiago sortzeak argi adierazten du ingurumen politikak eta sentsibilizazio kanpainak funtzionatzen ari direla”. Era berean, Udalak “hondakinen kudeaketa optimizatzeko eta puntu garbien erabilera sustatzeko” neurriak indartzen jarraituko duela adierazi du.
Beraz, guztira 2024an 2.012.835 kilo birziklatu ziren, eta biztanleko bilketaren portzentajea %32,18an kokatu zen. “Joera kontsumo-eredu iraunkorragoa da, eta administrazioak eta herritarrek batera egin behar dute ahalegina ingurumen-inpaktua murrizteko”, gehitu du Lejarragak.
