Urdaibaiko Ekoizleen Eguna antolatu du Ekoetxeak
Horrez gain, domekan [ekainak 23], 12:00etatik aurrera, Busturiko San Bartolome Amunategi upategia bisitatuko dute.
Amaitzen doa Ekoetxea Urdaibaik antolatutako Dastatu Urdaibai ekimena. Horretarako, asteburuan askotariko ekintzak antolatu dituzte. Ekoetxea Urdaibaik, Urdaibaiko Biosfera Erreserbako Patronatuaren Bulego Teknikoagaz, Urremendi Landa Garapenerako Elkarteagaz eta Urdaibaiko tokiko ekoizleekin batera, Dastatu Urdaibai programaren lehen edizioaren amaiera ospatuko du.
Herritarrei Urdaibaiko erreserban ekoitzitako sasoiko produktuen berri emateko, ekoizleak ezagutarazteko eta euren lana balioan jartzeko, herritarren eta ekoizleen arteko harremanak sustatzeko, eta produktuak bitartekari barik erosteko ekimena jarri du martxan Ekoetxea Urdaibaik Dastatu Urdaibai.
Zapatuan [ekainak 22] Urdaibaiko Ekoizleen Eguna ospatuko dute 12:00etatik aurrera, Ekoetxea Urdaibain. 12:00etatik 12:30era parte hartu duten egirale desberdinen aurkezpena egingo dute eta 12:30etik 13:00etara pintxoak aurkeztuko dituzte. Horrez gain, Dastatu Urdaibai proiektuko ikasturteko azken bisita gidatua egingo du domekan [ekainak 23]. 12:00etatik aurrera Busturiko San Bartolome Amunategi txakolindegira joango dira. Hori bai, parte hartzeko izena eman beharra dago www.ekoetxea.eus webgunean.
Duela mende batzuetatik hona, belaunaldiz belaunaldi, Amunategi baserrian txakolina modu tradizionalean egiten dute. Txakolin upategi “berezi hau” ezagutzeko gonbidapena luzatu dute, eta bide batez, baita Aranburu familiaren “tradizioa eta ardoarekiko grina” ere. Amunategi txakolina Bizkaiko Txakolina Jatorrizko Izendapenekoa da, eta izen bereko familia baserrian du jatorria. Amunategi upategian txakolin zuria egiten dute mahats mota hauekin: Hondarribi zuri eta Hondarribi zuri zerratia (Petit Corbou). “Ez galdu aukera hau bertako upategi bati laguntzeko eta gure lurraldeko onena etxera eramateko!”.
