Mendia eta herrigintza batzen dituen jaia, ate joka
Zapatuan [ekainak 8] egingo dute Gernika-Lumoko X. Mendijaia. Bina lasterketa eta mendi martxa egongo dira aurten ere. Aurten ez da mendi bizikleta martxarik egongo.
Gernika-Lumo inguruko mendizale eta mendi korrikalarien ordua iristear da. Datorren zapatuan [ekainak 8] Mendijaiaren X. ekitaldia egingo dute, Pasealekuan hasi eta amaituta. Arrolape Mendi Klubeko antolakuntza lantaldea jo eta su dabil egunotan, proposatuko dituzten ibilbideei azkenengo ukituak emanez. Ohiko legez, garro bi edukiko ditu aurtengo Mendijaiak: batetik, mendi martxak; bestetik, mendi lasterketak. Zehaztu dutenez, lehiaren gainetik, “mendiaz eta giro onaz” gozatzeko eguna izango da, eta “mendizale profil guzti-guztiek” tokia edukiko dute bertan.
Aurretiaz izena emateko epeak joandako urteetan baino emaitza “txikiagoa” eman arren, antolatzaileak esperantzaz daude: “Jende asko azken orduan eta eguraldiaren arabera animatu ohi da; beraz, espero dugu herritarrak oraindik animatzea”. Egunean bertan izena eman gura dutenek 17 euro ordaindu beharko dituzte, lasterketa luzea egin gura badute; martxa bietarako eta lasterketa laburrerako izen emateek, berriz, 15 euroko prezioa edukiko dute; 14 urtetik beherako mendizaleek, bestalde, 8 euroan edukiko dute izen ematea. Egunean animatzen diren dnek ala denek galtzerdi parea jasoko dute opari.
Guggenheim Urdaibai Stop herritar plataformara bideratuko dute aurtengo izen emateen euro solidarioa
Aurtengo izen emateko euro solidarioari dagokionez, Guggenheim Urdaibai Stop herritar plataformarentzat izango dela aurreratu dute. Iaz, Pablo Gonzalez kazetari elantxobetarraren aldeko elkartasun elkarteari bideratu zioten; aurten, eskualdean eraiki gura duten makroproiektuaren kontrako taldeak hartuko du lekukoa.
Azaldu dutenez, lau proposamenak urteroko inguruneetatik pasatuko dira, hau da, Gernika, Lumo edota Errigoiti aldetik; bidean topatuko dituzte, besteren artean, Ganaga, Maiaga zein Kosnoaga gainak. Hala martxa luzeak, nola lasterketa luzeak 17 kilometroko luzeradun ibilbidea edukiko dute, 900 metroko desnibel metatuagaz; aukera labur biek, ordea, 8,5 kilometro eta 450 metro positibo. Aukera luzea hautatzen duten mendizaleek anoa postu bi topatuko dituzte ibilbidean, eta laburrera jotzen dutenek, aldiz, bakarra. Bestalde, jasangarritasuna bermatu asmoz, aurreratu dute nork bere edalontzia eroatea derrigorrezkoa izango dela: “Ez da plastikozko edalontzirik egongo”.
Martxa luzeari 09:00etan ekingo diote, eta ibilbide luzeko korrikalariak 10:30ean hasiko dira lasterka. Martxa eta lasterketa laburreko parte hartzaileentzako irteera ordua ia berbera izango da: 11:00etan, lasterkariak; 11:10ean, martxalariak. Ibilbide guztiak amaitu ostean, pasta janean elkartu ahalko dira mendizale denak, irteera eta helmuga hartuko dituen eremuan bertan.
“Gernikako Piratak talde laguntzaileak atseden apur bat hartuko du aurten, baina hurrengo urtean egitaraura itzultzeko asmo argi eta garbia dute”
Aurtengo aldaketak.
Arrolapetarrek arazoak eduki dituzte aurten, Mendijaiaren data zehazterako orduan. “Izan hauteskundeak, izan herrian egon diren beste zenbait egitasmo potolo, ez da batere erraza izan data bat finkatzea. Dena dela, herritar guztiei parte hartzeko deialdia luzatzen diegu, Mendijaiak bere xarma eta maila mantenduko baititu aurten ere”, argitu dute. Aurten, ez da mendi bizikleta martxarik egongo: “Gernikako Piratak talde laguntzaileak atseden apur bat hartuko du aurten, baina hurrengo urtean egitaraura itzultzeko asmo argi eta garbia dute”.
Ibilbide guztiak amaitu ostean, pasta janaldia egingo dute Pasealekuan; sari ematea 13:30ean izango da
Beste urte batez, eskualdeko ekoizle eta eragileekin elkarlana sustatu dute. Hain zuzen ere banatuko dituzten garaikurrak Ander Zabala Since arteagarrak eta Barrutialdeko Zurgintza zikloko ikasleek egin dituzte. Ez hori bakarrik: “Ekoizleekin bertatik bertara lanean, zenbait zozketa ere egingo ditugu”. Lasterketa luzeko lehen hiru emakumezko eta gizonezkoak sarituko dituzte, baita lehen gizonezko zein emakumezko gernika-lumotarrak eta gazteen sailkapeneko lehen gizonezkoa eta emakumezkoa ere. Proba laburrean, berriz, lehen bi sailkatuak igoko dira podiumera; horiekin batera, gazteen sailkapeneko lehen hiru emakumezkoek eta gizonezkoek ere saria eskuratuko dute. Sari emate ekitaldia 13:30ean izango da.
