Dantzak hartu ditu Gernika-Lumoko eta Bermeoko bazterrak, asteburuan
Dantzaren Nazioarteko Eguna dela eta, hainbat ekimen izan dira asteburuan Gernika-Lumon zein Bermeon.
Argazkia: Txebi Arriaga Dantzari eta dantzazaleen egutegian gorriz markatutako eguna da apirilaren 29a. Izan ere, gaurko egunean ospatzen da Dantzaren Nazioarteko Eguna. Ospakizunetarako arrazoia izanik, askotariko ekintzak antolatu ziren astebururako Gernika-Lumon zein Bermeon.
Gernika-Lumon, bi dantza emanaldi eskaini zituen, zapatuan, Ross Dantza Eskolak. 17:00etan, Jai-Alai frontoian batu zituzten ehundaka dantzazale, eta 20:00etan Lizeo Antzokian izan ziren dantzariak. Gainera, domekan, Bizkaiko Foru Aldundiak Bilboko itsasadarraren ertzean kokatu zuen 250 metroko alfonbra gainean dantzatu zuten dantza eskolako dantzari batzuk.
Argazkia: Txebi Arriaga
Bermeon, berriz, zapatuan, 13:00etan portuan, eta 13:30ean Lameran izan ziren Ross Dantza Taldekoak. Atzo, bestalde, Divenire Dantza Eskolak Dantzaren Nazioarteko Eguna ospatzeko dantzaldia eskaini zuen, 12:00etan, Torrontero enparantzan.
