Santimamiñe kobaren ataria eta erreplika birtuala ezagutzeko hitzordua, bihar

Ice Age Museoen sarearen sorreraren 10. urteurrenagaz bat egin du Santimamiñek, eta urteurrena ospatzeko bisita gidatu bat prestatu du biharko. Domekan, haurrentzako tailerra egingo dute.

Ane Maruri Aransolo

Kortezubi

2023/09/26

Santimamiñek bat egin du Ice Age Museoen sarearen sorreraren 10. urteurrenagaz, eta hainbat ekitaldi antolatu ditu Ice Age Europe Week ekitaldiaren barruan. Biharko, esaterako, bisita bat prestatu du, kobaren ataria eta erreplika birtuala ezagutzeko eta guneak gordetzen dituen historiaurreko pinturak miresteko. Gainera, formazio geologiko konplexuko galeria ere ezagutu ahalko dute bisitara doazenek.

Domekarako, gainera, Artistak Historiaurrean haurrentzako tailerra egongo da Santimamiñen, eta, bertan, parte hartzaileek duela 15.000 urte kobazuloetako hormak apaintzeko erabilitako teknikak ikasiko dituzte.

Jarduera guztiak doakoak dira.

Antolatzaileek azaldu dutenez, Ice Age Museoen sarea orain dela 10 urte sortu zen, Europako museo eta arkeologia zentro nagusiek osatuta. Sarearen helburuak, besteak beste, Izotz Aroko ondarearen kontserbazioari buruzko kontzientzia sortzea, balorizazio programak garatzea eta zientziaren, kudeaketaren, pedagogiaren eta kultura turismoaren arloetan lankidetza sustatzea dira.