Bizkaiko Bertsolari Txapelketako sailkapen faseko azken saioak Busturian eta Zallan lehiatu zituzten atzo [maiatzak 25], eta Janire Arrizabalagak irabazi zuen Busturiko saioa. Ondorioz, erabakita geratu da ze bertsolari ariko diren Bizkaiko Txapelketan.
Janire Arrizabalaga bertsotan. Argazkia: Bizkaiko Bertsozale Elkartea. Amaitu da Udaberria Bertsotan sailkapen fasea, atzo (maiatzak 25) Busturian eta Zallan lehiatutako bertso saioen ostean, eta erabakita geratu da Bizkaiko Txapelketan kantatu duten bertsolarien zerrenda. Lurraldeko lehiaketan ariko dira, beraz, eskualdeko 11 bertsolari: Aitor Etxebarriazarraga Gabiola, Onintza Enbeita Maguregi, Julen Arzanegi Erezuma, Asier Galarza Garai, Beñat Bilbao Landa, Ibai Amillategi Omaetxebarria, Iker Uriarte Urrutia, Janire Arrizabalaga Munduate, Koldo Gezuraga Seijiido, Koldo Muñiz Aldamizetxebarria eta Mikel Retolaza Etxebarria.
Txapelketaren kanporaketetan hasiko dira Udabarria Bertsotan sailkapen fasetik sailkatutakoak eta 2021ean finalaurrekoetan kantatu zutenak; finalaurrekoetan, berriz, 2021eko finalistak sartuko dira. Ondorioz, Etxebarriazarraga eta Enbeita salbu –finalaurrekoetan hasiko dira–, eskualdeko beste bertsolari guztiak kanporaketa fasean hasiko dira.
Busturiko saioa. Atzo (maiatzak 25) lehiatu ziren Udaberria Bertsotan sailkapen faseko azken bi saioak, eta Janire Arrizabalaga nagusitu zen A multzoko Busturiko saioan. 174,5 puntu bildu zituen, bigarrena izan zen izaro Bilbao Arostegi baino 5 puntu eta erdi gehiago. Eneko Aldana Carrasco foruarrak 156 puntu eskuratu zituen, eta Asier Alcedo Canok 151 puntu. 147 puntu batu zituen Irune Basagoiti Agirrek, eta 144,5, berriz, Nagore Beitia Telletxeak.
B multzoko bertso saioari dagokionez, Zallan egin zuten, eta Bittor Altube Sarrionaindia nagusitu zen bertan, 190,5 puntugaz. Bigarren postuan Garikoitz Sarriugarte Onaindia sailkatu zen, 182,5egaz; Iruri Altzerreka Martinez izan zen hirugarrena, 177,5 puntugaz. Enare Muniategi Etxabe gautegiz arteagarra izan zen laugarrena, 170,5 puntugaz, eta Ander Aldazabal Olabarrik 170 eskuratu zituen. Jokin Ansotegio Vallejo de Olejua bertsolari gernikarrak, berriz, 137 puntu bildu zituen.
