Mundakan ere Berbalagun egitasmoa abiarazi dute
Interesa duten guztiek martxoaren 15ra arteko epea izango dute izena emateko.
Herrian euskararen presentzia indartzeko helburuz, Mundakako Udalak Berbalagun egitasmoa abiarazi du, lehenengoz.
Udal arduradunek jakitera eman dutenez, Berbalagun pertsona taldeak sortzean datza, “euskaraz berba egiteko ohiturarik ez dutenekin praktikatzeko eta berba egiteko”. Talde horietan, gainera, edozein pertsonak parte hartu dezake, “ez dagoelako publiko jakin bati zuzenduta”. Hala, euskaltegietako ikasleek, euskara ondo dakitenek, hainbeste praktika ez dutenek baina hizkuntza ezagutzen duten pertsonek… parte hartu dezakete, betiere, 16 urtetik gorako pertsonak badira, eta “euskaraz berba egiteko gutxieneko maila baldin badaukate”. Izan ere, diotenez, helburua da “euskararen erabilera eta praktika erraztuko duten topaketak sortzea”.
Mundakako alkate Irati Gondraren esanetan, Berbalagun proiektuak euskara praktikatzen laguntzen die herritarrei. Era berean, uste du “aukera ona” ere badela “pertsona berriak ezagutzeko, euskal kulturan murgiltzeko eta, azken finean, euskaraz bizitzeko eta euskara kalera ateratzeko”.
Izena eman behar da. Interesa duten guztiek martxoaren 15era arteko epea izango dute izena emateko. Udaletxeko bulegoetara jo daiteke izena ematera, 09:00etatik 14:00etara. Udalera edre deitu daiteke (94-617 72 00) edo harrera.mundaka@bizkaia.org helbidera mezu elektroniko bat bidaltzea ere posible dela adierazi dute.
Izena ematen dutenen artean adostuko dute noiz batuko diren. Zaletasun, adin eta denbora librearen arabera, talde bakoitzak erabakitzen du zer egin, noiz eta non.
