Hurrengo faserako txartelaren bila, Veneziara
Lointek Gernika Bizkaiak bihar jokatuko du Eurocup Womeneko bostgarren jardunaldia, Umana Reyer Veneziaren aurka. Joaneko partidan 59-76 galdu zuten, eta italiarren aurka ezustekoa ematen saiatuko dira biharkoan.
Joaneko partiduko une bat. Argazkia:Maria Mentxaka (Lointek Gernika Bizkaia) Eurocup Womeneko hurrengo fasean egoteko berebiziko garrantzia daukan partida jokatuko du bihar, 19:30etan, Lointek Gernika Bizkaiak. H taldeko liderra den talde gernikarrak Umana Reyer Venezia bisitatuko du, eta irabaziz gero, hurrengo faserako txartela eskuartean dutela bueltatuko dira Gernika-Lumora. Veneziarrak Eurocup Women irabazteko hautagai nagusienetako bat dira, baina Anna Montañaren taldeak Europako talde onenen aurka irabazteko gai dela erakutsi du Perfumerias Avenida taldea garaitu ostean.
Zaila izango den arren, ez da ezinezkoa Umana Reyer Veneziari irabaztea; izan ere, Italiako ligako azken bi partidak galdu dituzte errenkadan. Garaipena lortzeko ezinbestekoa izango da, baina, Awak Kuier italiarren hegal pibota ondo defendatzea. Zentimetro askoko jokalaria da, Julie Wojta gernikarren hegal pibota baino nabarmen altuagoa, eta joaneko partidan bera izan zen norgehiagokako jokalaririk onena. Horrez gain, gernikarrek kontu handia izan beharko dute baloi galtzeekin, maila honetako taldeek akats bat ere ez baitute parkatzen. Talde bizkaitarrak baloia arin mugitzea lortzen badu, eta kanpoko saskiratzeak lortzen baditu, garaipena lortzeko aukerak izango ditu.
Italiarren aurkako joaneko partidan, gernikarrek Europan duten porrot bakarra jaso zuten. Talde italiarra nagusi izan zen partida guztian zehar, eta ez zion talde gernikarrari partidan sartzen utzi. Veneziarrek defentsako lehen lerroan erakutsitako jarrera oldarkorrak gernikarren akatsak eragin zituen defentsan, eta ez ziren gustura sentitu momentu baten ere ez. Markagailua 59 eta 76koa izan zen.
Sentsazio onak.
Joaneko partidan ez bezala, gernikarrak sentsazio onekin heltzen dira Eurocup Womeneko bostgarren jardunaldira. Azkenengo astean lortutako garaipen biek konfiantzaz gainezka utzi dute taldea, eta italiarrek dakarten bolada txarrari jarraipena ematen saiatuko dira.
