Txerriki Eguna ospatuko dute muruetarrek domekan
XVIII. Txerriki Eguna egingo dute Muruetan. Besteren artean, txerriaren zozketa, bertso bazkaria eta zuzeneko musika edukiko dituzte.
XVIII. Txerriki Eguna ospatuko dute muruetarrak domeka honetan (abenduak 4). Goizean hasi eta arratsaldera bitartean, hainbat ekintza antolatu ditu udalak. Muruetako alkate Julen Karrionek adierazi du Txerriki Eguna heltzeko “oso gogotsu eta ilusioz” ikusten dituela herritarrak; izan ere, azkenengo bi urteetan ezin izan dute abenduaren lehen asteburuan antolatzen duten ospakizunaz gozatu.
Egunean zehar inongo arazorik egon ez dadin, alkateak azaldu du aurton, lehenengoz, karpa bi jarriko dituztela. Erabaki hau jaia “inongo arazorik gabe” ospatzeko hartu dute, eta euria egiten baldin badu, arazorik egongo ez dela azaldu du. Karpa bat Eleizalden egongo da, eta bestea, zelaian.
Domekan, 11:30ean batuko dira herritarrak, ohiko elizkizunean. Bertatik irten eta jarraian, 12:30ean, txupina jaurtiko dute, eta azokari hasiera ofiziala emango diote.
Muruetari festa giroa emateaz arduratuko dira lehenengo Urdaibai Dantza Taldekoak, eta jarraian Eingo! musika taldekoak. 15:00etan, Muruetako Txerriki Egunean ohikoa den bezala, txerria zozkatuko da.
Zozketa ostean, bertso bazkariaz gozatuko dute bertaratzen direnek. Sebastian Lizasok eta Ibai Amillategik alaituko dituzte bazkarira hurbildutakoak, bertso bidez. Bazkaltzeko txerrikia izango dute, eta oraindik zifra zehatzak ez dauden arren, jende asko apuntatuko dela aurreikusten dute udaletik. Aurton, bazkaria Eleizalden egingo da. Bertso bazkarirako sarrerak udaletxean daude salgai, abenduaren 1era arte. Nagusientzako prezioa 25 eurokoa izango da, eta umeentzakoa hamarrekoa.
Behin bazkalduta, gorputza mugituz emango diote amaiera egunari. Izan ere, Dj Giorgioren eskutik denontzako musika izango da Muruetan. Karrionek esan du “egun luzea eta egitaraua osatua” antolatzen saiatu direla.
Egitaraua:
– 11:30. Eliz Ospakizuna.
– 12:30. Txupinazoa eta azokaren hasiera.
– Jarraian. Urdaibai dantza taldea eta Eingo musika taldea.
– 15:00. Txerriaren zozketa.
– 15:30. Bertso Bazkaria.
– Bukatzeko. Musika denontzat, Dj Giorgioren eskutik
