Enbeita laugarren sailkatu da Bertsolari Txapelketa Nagusiaren bigarren itzuliko lehen saioan
Bigarren itzuliko lehen finalaurrekoa jokatu zuten zapatuan Amurrion, eta Onintza Enbeita Maguregi laugarren sailkatu zen; Alaia Martin Etxebestek lortu zituen puntu gehien. Abenduaren 3an jakingo da zeintzuk arituko diren Txapelketa Nagusiko finalean.
2022ko Bertsolari Txapelketa nagusiko finalaurrekoetako bigarren itzuliko lehen saioa. Amurrio. Argazkia: Gari Garaialde / Bostok Photo. Bertsolari Txapelketa Nagusiaren bigarren itzuliko lehen finalaurrekoa jokatu zuten zapatuan Amurrion, eta Onintza Enbeita Maguregi muxikarra laugarren sailkatu zen. Alaia Martin Etxebestek lortu zituen puntu gehien, eta, eskura du final handirako txartela. Hala ere, abenduaren 3an jakingo da zeintzuk arituko diren Txapelketa Nagusiko finalean.
Bertsolariek egin beharreko ariketak aldatu egin dira aurreko fasetik. Lehen bezala, binaka arituko dira zortziko handian zein txikian, baina, lehenago, ofiziotan egingo dute hamarreko txikia osatu arte. Gero, gabarako lanean bi puntu-erantzun osatu beharko dituzte, eta bakarka hiruna bertso amaitzeko.
Ariketa horietako emaitzak batuta, 676 puntu lortu zituen Martinek. Aitor Bizkarra sailkatu zen bigarren, 651,5 puntugaz, eta atzetik, puntu kopuru bera lortu zuten Oihana Iguaranek eta Enbeitak: 632,5. Agin Laburu izan zen bosgarrena 624 puntugaz, eta Miren Artetxek 595,5 bildu zituen.
Hala, lehen faseko eta bigarreneko lehen saioko puntuak bilduta lehen postuan dago Martin, 1.405,5 puntugaz. 1.329 ditu Bizkarrak, 1.321 Iguaranek, 1.301 Laburuk, 1.272 Enbeitak eta 1.240 Artetxek.
1.250 pertsona elkartu ziren zapatuan Amurrioko Bañueta kiroldegian, eta hurrengo hauek osatu zuten epaimahaia: Ainhoa Sarasua Lascarayk, Aitor Jimenez Tolosanak, Amaia Otxotorena Gamiok, Iñaki Aurrekoetxea Arkotxak, Mirari Azula Aurrekoetxeak, Nerea Bruño Artazkozek eta Zigor Leunda Eizmendik. Idazkari lanetan jardun zuten Joxe Mari Altuan Berridik eta Itziar Basterretxea Olarreaga.
Nerea Ibarzabal, Baionan.
Baionako Lauga aretoan jokatuko da bigarren itzuliko bigarren saioa zapatuan, 17:00etan, eta bertan ariko da Nerea Ibarzabal Salegi bertsolari markina-xemeindarra; beragaz batera ariko dira Beñat Gaztelumendi Arandia, Eñaut Martikorena Lizaso, Julio Soto Ezkurdia, Sustrai Colina Akordarrenenteria eta Unai Agirre Goia.
Finalaurrekoetarako sarrerak salgai daude www.bertsosarrerak.eus atarian.
