Lointek Gernika Bizkaiak Sofia Carolina Gomes da Silva jokalari portugaldarra fitxatu du 2022/2023 denboraldirako. Da Silva, dagoeneko, seigarren fitxaketa da datorren denboraldirako lantaldeari begira. 1’90eko altuera dauka pibotak, eta Duran Maquinaria Ensino taldetik dator. Azken denboraldian 6,4 puntu eta 2,4 errebote lortu ditu bataz beste, jokatu dituen 17:55 minutuetan. Da Silva eskarmentu handiko jokalaria da, urte asko daramatzalako Emakumezkoen Endesa Ligan jokatzen. Era berean, EuroCup Women txapelketa ere ederto ezagutzen du: 2017an finalaurrekoetara heldu zen Galatasaraygaz. Espainian jokatu izan duenean, sei talderen koloreak defendatu ditu: Cadi La Seu, Zamora, Girona, Promete, Movistar Estudiantes eta Lugo. Bere izaera eta gogortasuna dira Da Silvaren ezaugarririk nabarmenenak, eta hori saiatuko da islatzen, hain zuzen ere, Lointek Gernika Bizkaiagaz.
Izaera eta gogortasuna, datorren denboraldirako
Lointek Gernika Bizkaiak Sofia da Silva portugaldarra fitxatu du. Izaera, gogortasuna eta talde nortasuna emango dizkio taldeari. Da Silvagaz, hamar jokalari daude konfirmatuta 2022/2023 denboraldirako.
Argazkia: Juan Pelegrin. Lointek Gernika Bizkaiako entrenatzaile Mario Lopez gernika-lumotarrak Da Silvaren fitxaketa aztertu du: “Talde jokalaria dela esango nuke; oso fisikoa da eta Emakumezkoen Endesa Liga bikain ezagutzen du. Bere berezko postua pibota baldin bada ere, hegal pibot modura jokatzeko aukera ere ematen du”. Lopezek adierazi duenaren arabera, Da Silvak defentsan eta errebotean “izugarri” laguntzen du eta erasoan, ostera, “blokeo bikainak jartzen ditu”; gainera, kontraerasoan “oso bizkorra” dela azaldu du. Da Silvak, entrenatzailearen ustez, bizkarrez nahiz aurrez jokatzeko gaitasuna du eta uneoro bilatzen du erasoko errebotea. Argitu duenez, bere bertuteek eta eskarmentuak “bete-betean bat egiten dute” taldearen filosofiagaz eta joko moldeagaz.
