Xabi Barandika, finaleko txartelik gabe

Xabi Barandika gernika-lumotarra, Julen Del Rio gasteiztarragaz batera, ezin izan da Markina-Xemein Jai Alai Grand Slameko finalerako sailkatu. Aritz Erkiaga ispastertarraren eta Jon Zabala markina-xemeindarraren kontra ozta-ozta galdu dute finalaurrekoa.

Alex Uriarte Atxikallende

Gernika-Lumo

2022/07/11

Markina-Xemeingo Uni pilotalekuak Markina-Xemein Jai alai Gran Slameko bigarren eta azken finalaurrekoa hartu zuen zapatuan. Ikusleek beste behin erantzun egin zuten, eta frontoia lepo bete zuten, maila handiko partidua ikusteko. Finalerdiko protagonista nagusia Xabi Barandika gernika-lumotarra izan zen: partidu bikaina egin zuen, asko eta ondo errematatuz. Dozena erdi baino gehiagotan sartu zen sakeetara, eta ez zuen barkatu eskumakadekin.

Argazkia: Jai Alai News.

Dena dela, berak eta Julen Del Rio atzelari gasteiztarrak ezin izan zuten Aritz Erkiaga aurrelari ispastertarraren eta Jon Bullet Zabala atzelari markina-xemeindarraren kontra irabazi. Lea-Artibaikoak, irabazle suertatu arren, ez ziren beste hainbestetan bezainbesteko distiratsu agertu eta, horrenbestez, beren jokoa hobetu egin beharko dute, Jean Dominique Olharan pautarraren eta Nicolas Etxeto bidartarraren kontrako finalean garaipena eskuratzeko aukerekin aritu gura baldin badute.

Norgehiagoka bikote gorriaren alde hasi zen; 4-4ko markagailuaren ondoren, 8-5 aurreratu ziren. Del Riok min handia egin zuen atzealdeko koadroetan, baina baita hainbat akats ere. 15-11 amaitu zuten lehen seta, Erkiagaren kanpotik barrurako hegaleko indartsu bategaz. Atsedenaldian, Barandika aldageletara joan zen, orkatila bihurrituta. Hamar minuturen buruan, Gernika-Lumokoa pilotalekura itzuli zen, eta bigarren setari ekin zioten.

Argazkia: Jai Alai News.

Bikote urdinak partidua irauli egin zuen bigarren aldian. Del Riok bere mailarik onena erakutsi zuen eta Barandikak, atsedenaldiko ezustekoaren ondoren, ez zuen sufrimendu edota min zantzurik azaleratu. Ondorioz, gorriei asko zaildu zitzaien bai seta, bai partidua. Urdinak 1-9 aurreratu ziren; Erkiagak, bestalde, ez zuen sakeekin ganoraz asmatu, eta 6-15 galdu zuen bikote gorriak bigarren zatia.

Argazkia: Jai Alai News.

Berdinketa hausteak Barandika eta Del Rio izan zituen gidari lehen tantoetan: 1-3 aurreratu ziren. Dena dela, zenbait akats egin zituzten, eta Erkiagak eta Zabalak hirugarren set horri buelta eman zioten. Urduritasuna bere gailurrean izan zen: 4-4an egon zen markagailua. Azken tantoa etxekoentzat izan zen, eta Erkiagak eta Zabalak etxeko ikusleen aurrean eskuratu zuten finalerako txartela. Final hori, hain zuzen ere, Karmen Egunean, zapatuan izango da. Ikuskizuna 20:00etan hasiko da

Mutrikuarrak ere nagusi. Elite mailako txapelketan Eñaut Urreisti eta Mikel Manzisidor mutrikuarren 15-6 irabazi zieten Alex Goitia eta Danel Mandiola markina-xemeindarrei. Mutrikukoek ez zuten hanka onez abiatu partidua, baina bigarren setean nagusitasuna erakutsi zuten.