Eguaztenean hasiko da Jazzber Jaialdia Bermeon
Loek van den Berg Quintet, Vicente Marin Trio eta Filippo Deorsola taldeak izango dira jaialdian. Sarrera doakoa izango da, eta edukiera muga betetzearekin batera itxiko ddituzte ateak.
Alazne Zumeta Kultur zinegotzia eta Joseba Verdes JizJazzeko kidea. Eguaztenean hasiko da Bermeon, Jazz musika eta bere zaletasuna bultzatzea helburu duen Jazzber Jaialdia. Aurtengoa jaialdiaren 24. aldia izango da, eta hiru kontzertuk osatzen dute egitaraua. Kontzertuak Bermeoko Kafe Antzokian izango dira, eta ez da sarrerarik erosi beharko; edukiera bete arte egongo dira ateak zabalik.
Loek van den Berg Quintet herberehetarrak, Vicente Marin Trio espainarrak eta Filippo Deorsola Group italiarrak izango dira lehen mailako jazz-a Bermeora hurbilduko duten taldeak. Herberehetakoak zein italiarrak Getxoko Jazzaldi ospetsuan izango dira asteburuan.
“Jazzber jaialdia erreferentea da gure eskualdean. Izan ere, Busturialdean egiten den jazzaldi bakarra da. Aurten Getxoko Jazzaldian parte hartuko duten bi talde etorriko dira, eta estatu mailan erreferentea den Vicente Marin Trio entzuteko aukera ere izango dugu. Talde hauek jaialdiak duen maila bikaina erakusten dute, zalantzarik gabe. Udan jazz musikaz gozatzeko aukera paregabea da, eta bermeotarrak eta ingurukoak hona etortzera gonbidatzen ditugu”, adierazi du Bermeoko kultur zinegotzi Alazne Zumetak.
Etzi, Loek van der Berg Quint taldea igoko da Kafe Antzokiko agertokira; 2019. urtean abiatu zen. Ibilbide horretan taldeko liderraren konposizio melodiko eta malenkonitsuak ardatz dituen estiloa sortu dute.
Eguenean Vicente Marin Trioren txanda izango da. Formatu akustikoan, bere erreportorioan jazzaren, musika klasikoaren edo flamenkoaren eragina duten jatorrizko kantuen interpretazioa nagusitzen da. Gainera, Jon Karrantza kontrabaxu bermeotarra talde honen parte da. Bartzelonan ikasten du Karrantzak eta proiekzio handiko musikaria da.
Barikuan izango diren italiarrak inprobisazioan eta disziplina anitzeko kontzeptu filosofiko eta estetikoen ikerketan oinarritzen dira.
Egitaraua.
Etzi, ekainak 29
20:30. Loek van den Berg Quintet talde herberehetarraren kontzertua..
Eguena, ekainak 30.
20:30. Vicente Marin Trioren kontzertua Jon Karrantza kontrabaxu bermeotarra izango da.
Barikua, uztailak 1.
20:30. Filippo Deorsola Group talde italiarraren kontzertua.
