Astelehenean Astran hasiko da Bizkaiko Eskolarteko Bertsolari Txapelketa
Guztira 14 eta 18 urte arteko 30 bertsolari inguruk parte hartuko dute. Finala hilaren 28an jokatuko da Larrabetzun, baita Taldekako txapelketaren hiru finalaurrekoak eta finala ere, egun horretarako prestatu duten Bertsolaritza Egunaren baitan.
Astran jokatu zen Bizkaiko Eskolarteko txapelketako azken kanporaketa atzo. Argazkia: Bertsozale Elkartea. Asko dira bertsolaritza lantzen ari diren gaztetxoak Bizkaian, bai hezkuntza arautuan, bai bat-bateko taldeetan, bai bertso eskoletan, eta horiei plaza bat eskaintzen dien Bizkaiko Eskolarteko Bertsolari Txapelketa Astran hasiko da, astelehenean, 17:00etan.
Kulturarako fabrika sozialean lehiatuko den kanporaketaz gain, beste bi jokatuko dituzte bertsolari gazteek, bata, Bilbon, eta bestea, Durangon; maiatzaren 16an eta 18an lehiatuko dituzte horiek, hurrenez hurren.
Guztira 14 eta 18 urte arteko 30 bertsolari inguruk parte hartuko dute Bizkaiko Eskolarteko bat-bateko sariketan, eta kanporaketa bakoitzeko irabazleak zuzenean lortuko du finalerako txartela; gainontzekoak puntuazioaren arabera sailkatuko dira. Finalean buruz burukora ailegatzen diren bi bertsolariak, gainera, Euskal Herriko Eskolarteko finalean aritu ahalko dira.
Finalak eta bertsoaren eguna, Larrabetzun.
Eskolarteko bat-bateko sariketa maiatzaren 28an jokatuko dute Larrabetzun. Han lehiatuko dute, baita ere, eskolarteko idatzizko txapelketa. Bizkaia osoko 150 gazte inguruk lehiatuko dute, 10:00etan hasita, Larrabetzuko eskolan.
Eskolarteko txapelketez aparte, Bizkaiko Taldekakoaren hiru finalaurrekoak eta finala ere Larrabetzun lehiatuko dira, Bertsolaritzaren jaian; Busturialdeko Beethovenen belarriak eta Ez dakit ba! taldeak ariko dira finalaurrekoetan.
Bizkaiko Bertsolaritzaren jaia antolatu du Bizkaiko Bertsozale Elkarteak, Bizkaiko bertsolaritzaren ekosistema osoa –eskualdez eskualde eta eteneik barik– elikatzeko eta bertsogintzaren oinarria motibatzeko, finkatzeko eta garatzeko helburuz.
Bertso eskolen eta bertsozaleen jaia izango da, eta, horretarako, egitarau zabala antolatu dute. Goizean eskolarteko finalak izango dira, lehenengo idatzizkoa eta ostean, bat-batekoa.
Eguerdian, bazkari herrikoian elkartuko dira, eta bertaratu gura dutenek maiatzaren 19a aurretik tiketak erosi beharko dituzte www.bertsosarrera.eus atarian; aukera begetarianoak gura izanez gero, bizkaia@bertsozale.eus helbide elektronikora idazteko eskatu dute.
Eguna borobiltzeko, Taldekako hiru finalaurrekoak eta finala lehiatuko dituzte: 16:00etan izango da lehenengo kanporaketa, eskolan; 17:30ean, bigarrena, kalean; eta 19:00etan jokatuko da azkena, kalean. Finala, 22:00etan hasiko da Hori Bai gaztetxean.
