Roke eta Oier gernikarrak, Bizkaiko txapeldun
Arakis eta Atain II. (Markina-Xemein), Ibarluzea eta Elkoro (Markina-Xemein) eta Roke eta Oier (Gernika-Lumo) dira aurtengo gazte, nagusi eta elite mailetako Bizkaiko zesta-punta txapelketako txapeldunak. Kadete mailako finalak domekan [abenduak 19] erabakiko dira Berriatuan.
Txapeldunak, azpitxapeldunak eta klubetako ordezkariak finalen amaieran. Argazkia: Iñaki Arakistain
Barikuan [abenduak 10] jokatu ziren Markina-Xemeingo Uni frontoian Bizkaiko Kluben Arteko Zesta-Punta Txapelketako lehenengo finalak, eta elite mailan Roke eta Oier gernikarrak izan ziren nagusi. Gazte mailan Arakis eta Atain II. Markina-Xemeingo puntistak izan dira txapeldun, eta nagusien mailan ere Markina-Xemeingo klubeko Ibarluzea eta Elkorok eraman zituzten txapelak.
Partida gogor eta lehiatuak izan ziren hirurak, eta zesta-punta zaleek tantu eta joko bikainagaz gozatzeko aukera eduki zuten.
Elite mailan Berriatuko Antxon Alberdik eta Lekuek eta Gernika-Lumoko Rokek eta Diazek lehiatu ziren txapela lortzeko. Gernikarrek 10 tantoko aldea atera zieten aurkariei, baina berriatuarrek aldea murriztu eta gernikarrak estutasunean jartzera arte hurbildu ziren. Hala ere, markagailuari eutsi eta tanto biko aldeagaz txapela janztea lortu zuten Rokek eta Diazek.
Argazkia: Iñaki Arakistain
Gazteak izan ziren kantxaratzen lehenak. Gazteetan, Markina-Xemeingo Arakis eta Atain II. Berriatuko Xabi eta Ortzi puntistekin neurtu ziren. 30 eta 25 irabazi zuen Markina-Xemeingo bikoteak. Ondoren, nagusien mailako norgehiagoka jokatu zen. Nagusien finalean Ibarluzea I. eta Elkoro I. Lekeitioko Akarregi Pilota Taldeko Aitzol eta Paul Galletebeitia anaiekin neurtuko ziren. Lehia estua egon zen azkeneraino. Txapeldunek 30-28 irabazi zuten.
Kadeen finalak. Nagusien kategorietako txapeldunak erabakita badaude ere, kadete mailetakoak falta dira zehazteko. Domekan [abenduak 19] jokatuko dira Berriatuan mutilen kadete mailako finalak eta nesken kadete-gazte mailakoak. Berriatua eta Markina-Xemeingo bikoteak sailkatu dira finaletarako. Nesketan Ihart-Maialen (Berriatua) eta Erika-Elaia (Markina-Xemein) neurtuko dira eta mutiletan Jokin-Peru (Markina-Xemein) eta Danel-Xuban (Berriatua). Norgehiagokak 12:00etan hasiko dira.
