Laugarrenez, antzerkira hurbiltzeko ikastaroak prestatu ditu Artedramak
Hiru saio prestatu dituzte. Ander Lipusen eskutik, lehenengo saioa azaroaren 6an eta 7an izango Astran. Ikastaroetan parte hartzeko aurretiaz izena eman behar da.
Keinu antzerki ikastaroak antolatu dituzte Artedramak eta Gernika-Lumoko Kultur Etxeak laugarrenez. Antzerkira hubiltzeko eta udalerriko kultur eskaintza bultzatzeko helburuagaz, hiru saio prestatu dituzte Astran. Ander Lipusen eskutik, lehenengo saioak azaroaren 6an eta 7an izango dira; beste bi saioak hurrengo bi asteburuetan egingo dituzte.
Antolatzaileek arte eszenikoetara hurbildu gura duten herritarrei horretarako aukera eskaini gura diete, “jolasa, irudimena eta sorkuntza elementu nagusitzat dituen abenturan murgiltzeko”. Hori dela eta, parte hartzeko gonbidapena egin diete: “Saioak gure herriko zein eskualdeko antzerkigileei, antzerkizaleei eta etorkizuneko aktoreei zuzendu gura dizkiegu”. Hori bai, parte hartu gura dutenek izena eman beharko dute 615 77 95 11 telefono zenbakira deituta, info@artedrama.com helbide elektronikora idatzita edota www.artedrama.eus/keinu webgunera sartuta.
Arte eszenikoen munduan lehen pausoak emateko, euskarazko tailer trinkoak antolatu dituzte: “Antzerkia jolas moduan eta euskara hutsean lantzea da gure erronka nagusia”. Parte hartzaileak antzerkigile ezagunekin egingo dute lan, eta bertaratzen direnak “euren sormenezko unibertso propioa” eraikitzera bultzatuko dituzte. Antzerkiaren formak ezagutzea ere sustatuko dute.
Hiru sortzaile. Lehenengo saioan 16 urtetik gorakoek aktorearen jokoa eta dantza landuko dute Ander Lipusegaz. Eta gorputza eta irudimena jorratuko dituzte bigarren saioan Ruth Guimerari antzezleagaz; bigarren saio hori ere 16 urtetik gorakoentzat izango da.
Hirugarren ikastaroa Oihane Enbeita sortzaile gernikarrak gidatuko du. Aurrera gure shoew-a izeneko bi tailer eskainiko ditu, 6 eta 8 urte bitarteko gaztetxoentzat lehenengoa, eta, 9 eta 11 urte bitartekoentzat bigarrena.
Ikastaroen egutegia
Azaroak 6-7. Ander Lipusegaz ikastaroa Astran, 16 urtetik gorakoentzat.
Azaroak 20-21. Ruth Guimerarigaz saioa Astran, 16 urtetik gorakoentzat.
Abenduak 12-13. Oihane Enbeitagaz bi saio: 10:00etatik 11:30era sei eta zortzi urte bitarteko umeekin, eta, 12:00etatik 13:30era bederatzi eta 11 urte bitartekoekin.
