Datorren urtera atzeratu dute Fibrosis Quistica Arnasa elkarteari laguntza emateko elkartasun festa. Hala ere, herritarrek ekimenagaz bat egin dezakete oraindik, kamisetak Internetez eskuratuz.
Gutxieneko osasun eta segurtasun bermeak betetzen ez direla eta, bertan behera geratu da Batera Gara elkartasun jaialdia: “COVID-19aren pandemiak sortutako egoera dela eta, gizartarekin konprometituta gaude. Ekimena aurrera ateratzeko ordu asko sartu ditugun arren, ezinezkoa da elkartasun jaia ospatzea gutxieneko osasun eta segurtasun bermearekin”.
Ahaleginak eta bi egin dituzte jaialdia aurrera ateratzeko, baina “atsekabe handiz” bertan behera utzi behar izan dute ekimena. Hala ere, itzuliko direla diote, Fibrosis Quistica Arnasa elkarteari merezitako laguntza emateko: “Datorren urtean bueltatuko gara, oraindik eta indar eta gogo gehiagogaz, Fibrosis Quistica Arnasa elkarteari ondo merezitako laguntza eta bultzada emateko”. Hala, euren seme-alaba, senide eta inguruko bizilagunek bizi kalitate hobea izateko egiten duten lana eskertu eta mirestu dute beste behin.
Halaber, azken hilabeteetan ekimena antolatzeko lanetan eta laguntzen ibili dietenei ere, euren esker ona adierazi diete, “bihotzez”. Laguntzaileen borondate ona, prestutasuna eta denbora eskertu dute: “Eskerrik asko Gernika-Lumo eta inguruko herrietako ikastetxe eta ikastolei, beti gure ondoan sentitu zaituztegulako; Oxabiri beste behin ere gurekin bat egin duelako; Ehunzango talde guztiari, betiko legez, bidaide izatearren; Fibrosis Quistica Arnasa elkarteari hileotan gurekin buru-belarri lan egin duelako ekimena prestatzen; eta Gernika-Lumoko Udalari eta bestelako erakunde eta eragileei ere, eskerrik asko emondako babes eta laguntzagatik”.
Laguntza. Datorren urtera atzeratu dute jaialdia, baina laguntzen jarraitzeko aukera dute herritarrek, elkartasun jaialdiaren kamisetak eskuratuz. Ekimenaren Facebook eta Instagram kontuetan ere aurki daiteke lotura, erreserba egin eta kamiseta eskuratzeko. Erreserba eta diru ekarpena eginda, dendan eskuratu ahalko dira kamisetak.
