Arrizabalagak eta Aldaik ezin izan dute Bizkaia Txapelketako lehen partidua irabazi
Amaia Aldai eta Nora Mendizabalen kontra jokatu zuten, eta 22-8 galdu zuten norgehiagoka. Hurrengo bi partiduak irabazi beharko dituzte azaroaren 30ean jokatuko den finalean egoteko.
Argazkia: Unai Arrizabalaga Emakumezkoen esku pilotako Bizkaia txapelketako lehenengo partiduak hartu zituen barikuan Bilboko Bizkaia frontoiak. Olatz Arrizabalaga gernikarrak eta Gentzane Aldaik osatutako bikoteak Amaia Aldai eta Nora Mendizabalen kontra jokatu zuten, eta 22-8 galdu zuten norgehiagoka.
Indartsu kantxaratu ziren Aldai eta Mendizabal, eta lehenengo tantoak eskuratuz ihes egin zuten markagailuan. Erasoan bikain aritu ziren, ez zuten hutsegiterik egin, eta nagusitasunez gailendu ziren. Arrizabalaga eta Aldai markagailuan gerturatzen saiatu ziren arren, ezin izan zuten ezer egin.
Markagailuak hamalau tantoko aldea agertzen du, baina bi bikoteen arteko jokoa ez zela horren desberdina izan adierazi du Olatza Arrizabalagaren entrenatzaileak: “Partidua ez da bakarrik markagailuak islatzen duena. Kantxan ez zen horrenbesteko aldea egon, baina bikain jokatu zuten Aldai eta Mendizabalek. Hasieratik aurreratu ziren, eta markagailuan lortutako tartea kudeatuz erraz jolastu zuten. Ez zieten Arrizabalaga eta Aldairi ezertarako aukerarik eman”.
Aurrez aurreko lehenengo partidua jokatu zuten bi bikoteak dira txapelketako faborito nagusiak, baina lehenengo porrotagaz hurrengo bi partiduak derrigorrez irabazi behar dituzte Arrizabalagak eta Aldaik. Asteburukoa zen zailena, baina besteak ere oso “parekatuak” izatea aurreikusi dute: “Finalera heltzea ez da erraza izango”.
Hurrengo norgehiagoka barikuan lehiatuko dute, eta Arrate Bergara eta Olatz Ruiz de Larramendi izango dituzte aurrez aurre. Bergarak eta Ruiz de Larramendik ere lehenengo partidua galdu egin zuten; 22-21 aurreratu ziren Iera Agirre eta Ainhoa Romero.
Txapelketaren finalaurrekoak eta finala azaroaren 30ean lehiatuko dira.
