Ikasitakoak erakusteko, bertsoak oholtzara
Gernika-Lumoko ikasleek bertso saioa eskeini dute gaur Lizeo Antzokian. Hala, ikasturte osoan ikasitakoak plazaratu dituzte beste ikastetxeetako ikasleen aurrean. Eurekaz egon dira Mikel Retolaza eta Ibai Amillategi bertsolariak.
‘Gu ere bertsotan’ programako bertso saioak egin dituzte gaur Gernika-Lumoko Lizeo antzokian.
“Bertsoa eta euskara bultzatu asmoz”, ikastetxeetan ikasturte osoan garatzen duten bertsolaritza egitasmoa da honakoa. Hala, ikasturtean zehar ikasitakoak oholtza gainean erakutsi dituzte ikasleek gaurkoan.
Denetariko ariketak egin dituzte, eta eurekin batera aritu dira Mikel Retolaza eta Ibai Amillategi Lilibertso bertso taldeko kideak.
Lehen Hezkuntzakoen saioan Allende Salazar, Barrutia eta Mertzede eskoletako eta Seber Altube eta San Fidel ikastoletako ikasleek parte hartu dute, eta Derrigorrezko Bigarren Hezkuntzakoenean, Gernikako Institutuko, Barrutialdeko, San Fideleko, Seber Altubeko eta Mertzedeko gaztetxoak egon dira.
