Finalerdietara sailkatzeko joaneko neurketa jokatuko dute Bermeok eta Orozkok
Bizkaiko Herriarteko Txapelketa final laurdenetan dago, eta Bermeoko Artza Pilota Elkarteko pilotariek Orozko izango dute aurrez aurre joaneko eskuz binakako partidan.
Artza pilotalekua Bizkaiko Herriarteko Txapelketan Bermeoren eta Orozkoren arteko kanporaketa jokatuko da igandean [ekainak 2], Artza pilotalekuan. Eskuz binakako saioan, bermeotarrek final laurdenetako joaneko partidak lehiatuko dituzte Kadete, Gazte eta Nagusi mailetan. Orozkoko frontoian jokatuko dituzten itzulerakoak noiz egingo dituzten, oraindik ere, erabakitzeke daude. Guztira, sei neurketatik lau irabazten dituen herria sailkatuko da finalerdietara.
Sopelako pilotariek eskuan izandako lesioak direla eta, maiatzaren 24an jokatu behar izan zuten kanporaketa bertan behera geratu zen, eta Artza Pilota Elkarteko bermeotarrak zuzenean igaro ziren hurrengo fasera.
Guztira 24 herrik parte hartu dute Bizkaiko Herriarteko Txapelketaren 50. ekitaldian. Maiatzaren 5ean hasi zen, eta ekainaren 28an jokatuko dira finalak, Zeanuriko frontoian.
Artza Pilota Elkartea 1976. urtean sortu zen, eta ordutik herritar asko igaro dira bertatik.
