Bustia, baina atzo baino jendetsuagoa
Eguraldia lagun izan ez arren, azokara doan jendea erostera doala esan dute saltzaileek.
Aterkipekoa da aurten arrain azoka. Zenbaki borobila du: 25. edizioa da, baina giroa ez da espero bezain ona. Eguraldi eskasa da atzo eta gaur Bermeon izan dutena, baina saltzaileak baikor agertu dira. Atzoko erantzuna ikusita, gaur goizean eta eguerdi partean jende gehiago ikusten zen Lamerako postuen inguruan. Cusumanoko saltzaileak, adibidez, eguraldiak salmentetan eraginik ez duela izan esan du. “Jende asko etorri zaigu bai atzo eta baita gaur ere, goizetik. Eguraldiaren eraginik ez dugu igarri bereziki, ez txarrerako, berdin-berdin saldu dugu eta”.
Campos eta Carmelo Tojako salmahaietako saltzaileak ere ez dute uste salmenten beherakada hain nabarmena izango denik. Eguraldiaren eraginez azokan ohi baino jende gutxiago dabilela aitortu dute, baina bariku eguerdian eta zapatuan ondo saldu dutela esan du Carmelo Tojako saltzaileak. “Euriak eragina du, baina ez da horrenbesterako. Aurre egingo diogula uste dut, eta domeka eguerdian ere jendea ibiliko delakoan nago, txikiteoak lagunduko du”, esan du.
Campos postuko saltzailearen esanetan, aurtengo eguraldia benetan txarra dela esan du, eta barikuan salmentetan nabari izan dutela aitortu du. Hala ere, zapatuan hurbildu den jendea erosteko asmoagaz joan dela dio, “gauza konkretuen bila datoz erosleak eta zapatu goizean polito saldu dugu”. Domekarako bildur da, “eguraldi eskasak ez du laguntzen, eta hainbat gauza daude antolatuta, Lekeition Ibilaldia, esaterako”. Dena den, Bermeon ere, arrain azoka dela-eta hainbat jarduera antolatu dituzte, eta horiek jendea erakarriko dutelakoan dago.
Isabel eta Cuca salmenta postukoak ere itxaropentsu daude. Iazko edizioarekin alderatuta, barikuko salmentek behera egin dutela esan du. Hala ere, azokakideek esan legez, Lamerara hurbildu den jendea erosteko asmoz joan da zapatuan, eta zer erosi behar duen badakiela.
Atzo inauguratu zuten 25. Arrain Azoka, Bermeo Tuna World karpan egin zuten ekitaldiarekin.
EGITARAUA:
Domeka, maiatzak 19:
- 11:00. Bostale elkartearen tailerra, BTWC karpan.
- 12:00. Eroskiren tailerrak, BTWC karpan.
- 12:00. Umeak arrainekaz tailerra Berton elkartearen eskutik, BTWC karpan.
- 12:30. Bermeoko Erraldoien Konpartsaren eta Deustuko Ondalan erraldoien konpartsaren kalejira, Lameran eta Portuzarrean.
- 13:00. Aranzadi elkarteak egindako lanaren azalpena.
- 14:00. Zero plastiko Urdaibai ekimena, BTWC karpan.
Eguneroko Jarduerak:
- Kofradia Zaharrean. Atun errea eta marmitakoa jateko aukera 11:00etatik 22:00etara bitartean. Domekan, eguerdira arte banatuko dute janaria. Ekimenak helburu solidarioa dauka. Gainera, arrain salmenta irudikapena 13:30ean eta 17:30ean euskaraz eta 11:30ean eta 19:30ean gaztelaniaz (domeka arratsaldean izan ezik). Corrado Bonomik egindako arrain laten erakusketa ikusgai egongo da.
- Arrantzaleen Museoan. Izena hartu eta izena emon erakusketa. Sarrera doakoa.
- Hegaluze ontzian irteerak. Zapatuan, 12:00etan, Gaztelugatxera, eta 18:00etan, Elantxobera. Domekan, 12:00etan, Elantxobera, eta 18:00etan, Gaztelugatxera. Nagusiek 12 euro ordaindu beharko dituzte, eta umeek, berriz, 7 euro.