Utopistatik estudiora
'Utopista' diskoagaz aurrera eta atzera ibili da aurten Dientes de Luna talde gernikarra. Durangoko Azokan egon eta gero, Madrilen agurtu du bira. Orain, baina, martxoan aurkeztuko duten diskoa prestatzen dabiltza.Milaka kilometro. Hainbat egonaldi et...
‘Utopista’ diskoagaz aurrera eta atzera ibili da aurten Dientes de Luna talde gernikarra. Durangoko Azokan egon eta gero, Madrilen agurtu du bira. Orain, baina, martxoan aurkeztuko duten diskoa prestatzen dabiltza.
Milaka kilometro. Hainbat egonaldi eta geltoki desberdin. Nekea eta gozamena. Baita bizipenez beteriko esperientziak ere. Horiek dira birak. Utopista lanagaz aurrera eta atzera ibili eta gero, Dientes de Luna talde gernikarreko kideek amaitu dute aurtengo joan-etorria. Orain, martxoan estreinatuko duten hirugarren diskoaren prestakuntzan dabiltza buru-belarri.Esperientziez bete dute maleta. Iazko urtarrilean aurkeztu zuten Utopista, eta martxotik ekainera bitartean, Euskal Herriko hainbat eta hainbat herritan erakutsi zuten diskoa; baita Katalunian ere. Udan geldialdia eginda, irailean oholtzara igo ziren berriro, eta Euskal Herrian ezeze, Espainiako zenbait hiritan ere aritu dira. Azkenengo emanaldia abenduaren 8an eman zuten, Madrilen.
Lander Egia, Aimar Cid, Unai Bilbao eta Joseba Mugartegigaz batera, aurtengo biran Amaiur Zugadi eta Gorka Etxeberria ere aritu dira. Beraien ekarpena «sekulakoa» izan dela aitortu dute taldekideek, eta musikalki euren eragina asko nabaritzen dela diote: «Pentsatzeko bi buru gehi- ago dira».
Taldekideen berbetan, «oso pozik» amaitu dute beraientzat garrantzitsua izan den bira. Izan ere, urte osoan han eta hemen izan duten oihartzuna ez zutela espero esan dute: «Ez genuen horrenbeste kontzertu ematea espero, ez eta jendearengandik jaso dugun erantzuna edukitzea ere. Harrituta gaude».
«Sekulako» esperientzia
Euskal Herriko herri handi eta txikietatik pasatu dira, baita kanpokoetatik ere. «Etxean eta etxetik kanpo taldeak zelako harrera duen probatu gura izan dugu biragaz, eta balorazio oso positiboa egin dugu», diote seirek. Pentsatu barik errepikatuko luketen esperientzia izan dela diote, eta toki desberdinetako jendea euren abestiak kantatzen entzutea «sekulakoa» izan dela onartu dute.
Harrigarriena kanpora joan eta jendeak abestiak jakitea izan dela onartu du Egiak. Eta aretoetan jasotako berotasuna azpimarratu du Mugartegik.
Apirilean Gernika-Lumon etxekoen aurrean aritu ziren, eta kontzerturen bat aukeratzekotan, hori aukeratuko lukeela dio Zugadik: «Etxean jotzeak exijentzia handiagoa eskatzen du, baina sekulakoa izan zen Iparragirren emandako kontzertua, asko gozatu nuen. Oholtzara atera baino lehenago oso urduri geunden arren, sekulakoa izan zen».
Birari agurra, baina, Madrilen eman zioten. Ez zutela hainbeste jende espero dio Cidek: «Madrilgo jendea hurbildu zen, baita han bizi diren euskaldunak ere. Gure kantuak abesten egon ziren, eta utopikoa izan zen hori».
Ahotsenean aritu ziren Dientes de Lunako kideak Durangoko Azokan, eta esperientzia «berezia» izan zela diote. Euskarazko abestiak abestu zituzten, eta denbora gehiagoan jotzen egoteko gogoz geratu zirela aitortu dute. Postura ere herritar «asko» gerturatu zitzaizkien, eta balorazio «ona» egin dute.
Duela bi aste amaitu zuten bira, eta bukatzeko gogoa zeukaten arren, orain, faltan botatzen dituzte agertokiak. «Bira bukatzen joan ahala, azkenengoz jo ditugu hainbat abesti. Kanta berriak datoz, eta zaharren bat edo beste bidean geratuko dira». Arlo pertsonalean «asko» ikasi dute.
Azken ukituak ematen
Dagoeneko ia dena zehaztuta dauka Dientes de Lunak. Lan berriari ukitu txikiak besterik ez zaizkio geratzen. Martxoan aurkeztuko dute hirugarren lan luzea, eta Utopista-ren jarraipena dela onartu dute: «Utopista lanaren eboluzio naturala da. Hala eta guztiz ere, pauso ausartak eman ditugu».
Ikasi dutena musikagaz landu nahian, berrikuntzak sartu dituzte, baina lan berrian taldearen esentzia nabaritzen dela diote. Hala, rocka muga desberdinetara eraman gura izan dutela dio Etxeberriak: «Oinarria gure estiloa da, baina badaude desberdinak diren abestiak ere, ausartagoak direnak. Hala ere, Dientes de Luna izaten jarraitzen du, eta nabaritzen da zein abesti diren Utopista-ren jarraipen zuzena eta zeintzuk gero landutakoak».
Urte osoan kontzertu asko izan dituzten arren, udan bi hilabeteko geldialdia egin zuten lan berria prestatzeko. «Aurrekoaren jarraipena den heinean, nahikoa jarraian publikatu nahi dugu, eta hori prestatzeko, udan gelditu ginen». Hala eta guztiz ere, urte osoan konposatzen egon direla dio Cidek: «Urtean konposatu duguna bi hilabete horietan zehaztu genuen. Ordu askoko lana da».
Dientes de Lunako taldekideek esker bereziak eman nahi dizkiete bira osoan emanaldietara joan direnei. «Etorri direnei eskerrak, baita beti egon direnei ere, taldeagaz beti mantentzeagatik».
