Hamabosgarrenez sortzaileen topaleku izaten ari da egunotan Ea. Atzo heldu ziren sortzaileak herrira, baita horiekin gozatzeko aukera galdu nahi ez duten ikus-entzuleak ere.
Lurra, sustraietatik orri lelopean herria poesiaz bete zuten atzo, eta gaur ere bere horretan ari dira bertaratutakoak. Mikel Laboaren bost pieza esperimentaletatik eratorritako Lekeitioak dantza ikuskizuna eskaini zuen atzo Mizel Theret koreografo eta dantzari garaikideak.
Gaur, berriz, aukera zabala izan dute herritarrek. Ibai Atutxagaz euskal herritarrek egungo literaturan duten presentziaz aritu dira hizketan eskolondon. Eguerdian, berriz, Martin Bidaur eta Juango Olasagarre poetekin gozatu dute herritarrek moilan; emanaldia girotzen egon dira Trizak taldeko musikariak eta Eneritz Artetxe aktorea.
Arratsaldean, Earako beren beregi sortutako kale antzerkia aurkeztu dute. Metrokoadroka Sormen Lagorategiaren Zanbuia! aurkeztu baitute kalez kale.
Zuzenean ARGAZKI GALERIARA joan
20:30ean, Parrapean errezitaldia egingo dute Portusolon Josu Landak, Gotzon Barandiaranek, Itziar Castrillok eta Ane Garciak. Gauean berriz, 22:45ean, Mice taldearen kontzertua egongo da Eskolapean.
Bihar arratsaldean, La Basu rap kantari etxebarritarraren letrekin amaituko dituzte Eako Poesia Egunak. 20 urtetik gorako ibilbide musikala daroa, eta bere azken lana aurkeztuko du: Ni naiz izotz erregina. Soinu eta berba indartsuak batzen ditu Euskal Herrian bakarkako emakumezko batek euskaraz argitaratutako lehen disko honek.
Biharko egitaraua:
- 11:00. Lurra, animaliak, emakumeak: Desokupazio-Ariketa 5 ekitalditan hitzaldia, Mari Luz Estebanegaz, Eskolondon.
- 13:00. eMe taldearen eta Oier Guillanen kontzertua, moilan.
- 15:00. Herri bazkaria, Eskoikiz tabernan.
- 17:30. Ni naiz izotz erregina kontzertua, La Basugaz, frontoiko arbolapean.
