Errepideen Plan Sektorialaren irizpideak berrikusteko eskatu dio Bilduk Bizkaiko Aldundiari
Bilbon bilduta, “azken urteetan mugikortasunean erabili dituen irizpideak berrikus” ditzan eskatu diete Arratiako, Busturialdeko, Uribe Butroeko, Lea-Artibaiko eta Durangaldeko Bilduk Bizkaiko Foru Aldundiari, eskualde horietan mugikortasunean zein errepideetako segurtasunean hutsune handiak daudela iritzita. Zenbait inbertsioren inguruko erabakiak hartzerakoan, gainera, diputazioak herrien eta eragileen parte hartzea bideratu beharko lukeela deritzo koalizioak.
Duela urtebete onartu zituzten Bizkaiko Batzar Nagusiek Bizkaiko Errepideen Plan Sektoriala eta bidesariei buruzko araua eta, besteak beste, aipatu eskualdeetan azpiegitura barriak eraikitzea aurreikusi zuen. Egungo egoera ekonomikoak, baina, obra horiek baldintzatuko dituela uste du Bilduk. Ardatz erradialen inguruan Bizkaiko Foru Aldundiak emandako azalpenak “behar bestekoak izan ez” direla dio Bilduk, “eta oposizioko taldeetan, udaletan zein herritarren artean ezinegona sortu du”. Bilduren arabera, “gauza jakina da ez dagoela denetarako dirurik, baina umiltasun eta gardentasunez hori esan beharrean, edo lehentasunak herriekin eta oposizioarekin adostu ordez, berriro ere alde bakarrak hartu ditu erabakiak”. Jarrera horregaz udalekiko eta herritarrekiko errespetu gutxi erakuste duela deritzo koaliazioak. “Irizpide politikoak baino ez dituzte erabili eraikiko dituzten hiru errepide berriak aukeratzerakoan”.
Bada, Autzaganeko tunelari dagokionez,”ingurumen txostenik ez” dagoela dio Bilduk. “Beraz, tunela egingo dute, baina handik aurrerako bidea nola egingo den jakin gabe. Bitartean, ez diote kasurik egin trenbidearen ondotik, baserriei kalterik egin gabe, oraingo errepideari bide paraleloa egiteko proposamenari”.
Bermeoko saihesbidea da aurreikusitako beste proiektu bat eta, azaldu dutenez, “ez du Bermeon dagoen trafiko arazoa guztiz konponduko”. Beraz, “erdizkako proiektua” onartuko dutela uste du Bilduk.
Hori guztia kontuan hartuta, ondoko eskaera zehatzak egin dizkio Bilduk Bizkaiko Aldundiari:
- Bilduko batzarkideek alderdi politikoei eta Bizkaiko Foru Aldundiari egin dioten proposamena geure egiten dugu; hau da, 2011n egindako Errepideen Plan Sektorialean erabakitako azpiegiturei dagozkien irizpideak guztion artean adostu, planeatu eta berrikustea nahi dugu. Baita bidesarien gaineko foru araua ere. Orain arte egin diren azpiegiturak ez dira ekonomikoki bideragarriak izan, ingurumenean kalte handiak eragin dituzte eta ez dute lagundu trafiko bolumena gutxitu eta garraio publikoa sustatzen.
- Ardatz erradialen ibilbideak berriro ere aztertzea nahi dugu herrien ekarpenak entzunda, ekonomiko zein ingurumen aldetik jasangarrienak diren erabakiak hartzeko.
- Gure udalerrietan ditugun trafiko eta segurtasun arazoak konpontzeko beharra daukagu, eta horrek izan behar du lehentasuna. Herriguneak zeharkatzen dituzten errepide arriskutsuak edo trafiko astun asko hartzen dutenak berrikusi eta konpondu behar dira.
- Foru Aldundiaren lehentasuna garraio publikoa izan dadin eskatzen dugu, eta egin ditzatela garraio sistema benetan publikoa lortzeko beharrezko inbertsioak, trenbide sarea sendotuz, esate baterako. Garraio ezberdinen arteko lotura eskatzen dugu: autobusa, tranbia, metroa… eta ibilbide laburretarako bizikleta, adibidez.
