Alexis Apraiz gernikarrak eta Oinatz Bengoetxea leitzarrak Binakako Txapelketa Nagusiko partida jokatuko dute Santanapen Xala eta Laskurainen kontra, domekan. Material hautaketa gaur egin dute, eta pilotalekuan batu dira lau pilotariak.
Pilota jaialdia, 17:00etan hasiko da domekan Promozio Txapelketako partidagaz. Ostean, Apraizek eta Bengoetxea VIak, Xalaren eta Laskurainen kontra jokatuko dute jaialdiko partida nagusia.
Gernikarra eta leitzarra sailkapen nagusiko bostgarren postuan daude, baina laugarren sailkatuagaz bardinduta. Hala, partida garrantzitsua izango da etzikoa, finalaurrekoetako ligaxkagaz amets egiten jarraitzeko.
Galduz gero, gainera, Xalak eta Laskurainek garaipen kopuru bardina izango lukete sailkapenean. Hiru garaipenegaz, Apraizekin eta Bengoetxearekin bardinduta egongo lirateke.
