San Martin jaien baitan, bederatzigarren txerriki azoka antolatu du Andeko tabernak, domekan, 10:00etatik 15:30era. Guztira, 32 postu izango direla azaldu dute antolatzaileek, eta gehienek txerrikiak salduko dituzte. Azokaren baitan, odoloste onenak ere saria jasoko du. Txapelketa horretan 22 parte-hartzaile izango dira.
San Martin jaien baitan, bederatzigarren txerriki azoka antolatu du Andeko tabernak domekarako. Bertan, guztira, 32 postu izango direla azaldu dute antolatzaileek. Txerriki azoka den heinean, postu gehienek txerrikiak salduko dituztela adierazi dute. Hala ere, gazta, txakolina, ogia eta eztia bezalako produktuak ere izango dira.
Hain zuzen ere, Bermeoko sei harategi izango dira azokan, eta Mungiatik eta Lezamatik etorritakoek ere parte hartuko dute.
Odoloste txapelketa
Txerriki azokaren baitan, urtero legez, barazkiekin egindako odoloste onena sarituko dute. Hiru onenek jasoko dute saria, hain zuzen. 22 parte-hartzaile izango direla jakinarazi dute. Epaimahaia 13 lagunek osatuko dute. Sukaldari profesionalak, baserritarrak eta herriko jendeak parte hartuko dutelarik.
Bestelako sari bat ere banatuko du Andeko tabernak. Azokako erakusmahai onenak ere jasoko baitu saria.
10:00etan hasi eta 15:30era arte izango da azoka Lamera parkean, eta sari banaketa 13:30ak aldera izango da Lamerako kioskoan.
