Pauso txikiz, kate handia osatzen
24. Korrika Busturialdera ailegatu orduko, motorrak berotu dituzte ikasleek Korrika Txikietan. Arrakastatsuak izan dira beste behin, eta kateari eusteko aldarrikapena zabaldu dute.
Badator Korrika! Bai, heldu da eguna, eta goizaldeko ordu txikietan Busturialdea zeharkatuko du, Bedarutik sartuko da lekukoa, eta Bermeotik atera, bihar goizean goiz.
Aurretik baina, giro umela ondo baino hobeto berotu dute eskualdeko ikastetxeetako ikasleek. Ikasgeletatik atera, eta kalerik kale ibili dira, irribarretsu eta gogotsu. Korrika Txikiak arrakastatsuak izan dira beste behin; ume-umetatik ilusioa eta zirrara pizten duen euskararen aldeko lasterketa da Korrika, eta gaur ere agerian geratu da hori.
Muxikako Urretxindorra Herri Eskolakoek Gorozikako Barnetegikoak izan dituzte korrikalagun aurten. Eskola inguruko aldapa gogorretan ibili dira, eta amaieran, lekuko barruko mezua atera, eta irakurri dute: “Euskara zoroa da; Euskal Herri zoro honetan zer da bada, Korrika? 11 egunez herriz herri, Atharratzetik Bilbora, Euskal Herri osoa zeharkatzen, atseden barik. Ez dago mundu osoan hau baino maitasun adierazpen ederragorik”. Denek elkarrekin sentitu, pentsatu eta ekiteko eta kateari eusteko aldarrikapena zabaldu dute.
Gernika-Lumon ere, euskararen aldeko aldarria zabaldu dute pausoz pauso udalerriko ikastetxeetako ikasleek: Seber Altubeko, Allende Salazarreko, Mertzede Ikastolako, Barrutiko eta San Fideleko ikasleek euriaren azpian egin dute korrika, eta mela-mela egon badira ere, euskarak duen indarra erakutsi dute 2,5 kilometroko Korrika Txikian.
Pasealekutik atera, eta udalerriko kale eta txokoak zeharkatu dituzte, gero, berriro, Pasealekura itzultzeko; han, bertsotan, beraientzako Korrika zer den adierazi dute koplaka: “Zenbat elkartu garen Korrika txikian, euskara zabaltzeko Gernika erdian”. Eta, udalerrira goizeko 03:00etan ailegatzen dela aipatuta, ausardiaz jokatuz gero “oso urrun” ailegatu daitekeela esan dute: “Lekukoaren aurretik doa doa furgoneta, petoaren moduan kolorez beteta. Atharratzen hasita, bagoaz Bilbora, lehenengo Gernikan egin beharko da. Benga denok batera, korrika jo ta ke; hemen egongo gara, Bilbora heldu arte”. Esan dute “pozik” daudela beraien hizkuntza “maitatuz eta ikasiz”, badakitelako beraiek egingo dutela euskaldun udalerria: “Korrika bukatuta, milaka taupada. Abestian bezala, gu euskara gara”.
Bermeoko ikasleek ere, euriari aurre egin, petoak jantzi eta herrian zehar atera dituzte euskara eta Korrikaren aldeko aldarriak. Nadia Nemeh alkatearen eta Iker Bilbao Euskara zinegotzia izan dira Korrika Txikian lekukoa hartzen lehenenak, eta gero ikastetxez ikastetxe aritu da: Eleizalde Ikastolako, Bermeoko Herri Eskolako, Sagrado Corazon Ikastetxeko eta Bermeoko Institutuko ikasleen eskuetatik igaro da lekukoa, Lameran Motx pailazoak hartu duen arte. Herrian zehar hamaika aldarri zabaldu dituzte, ikasleek ozen oihatu baitituzte Bermeon ere euskararen alde bezalakoak. Euriak baina, lasterketaldi osteko Motx pailazoaren ekitaldia bertan behera uztea ekarri du: “Zoritxarrez bertan behera utzi behar dugu ekitaldia, baina hurrengo Korrikan elkartuko gara. Bitartean, jarraitu euskaraz urteko 365 egunetan!”.
Gero, berriz, 24. Korrikaren abestia, Xiberutikan Mendebaldera kantatu eta dantzatu dute.
Arratsaldean gehiago. Bestalde, Gautegiz Arteagan, Ibarrangelun eta Mundakan arratsaldean egingo dituzte Korrika Txikiak.
Mundakarrak 15:15ean elkartu, eta Santa Katalinatik plazaraino joango dira. 15:30etik aurrera, berriz, bertsoa bota, dantzatu eta argazkia aterako dute.
Ibarrangelun 18:00etan ipini dute ordua. Lehenago, 17:00etan hasita, nork bere petoa egiteko tailerrean bilduko dira. Gainera, astean zehar, herritarrek kartel erraldoia egin dute auzolanean. Korrika Txikia amaituta, askaria edukiko dute parte hartzaile guztientzat.
Gautegiz Arteagan 18:30ean egingo dute herrian zehar. Aurretik, petoak prestatu eta pankartak marrazten arituko dira, 17:00etatik aurrera. Korrika Txikia amaituta, txokolatea banatuko dute, eta musikarik ere ez da faltako. Gainera, bakoitzak bere janaria eramanda, elkarrekin afalduko dute.
