Bermeotarrak musikaren olatuetan murgilduko dira egunotan
Musikaren Olatuak izeneko kontzertu zikloa hasiko dute gaur arratsaldean [martxoak 9], Bermeon. Udalerriko musika eskolako ikasleen lana jendaurrean aurkezteko eta herritarrei zuzeneko musikaz gozatzeko aukera eskaintzea du helburu zikloak, eta lehenengo egunean, bateria, piano eta trikitixa ikasleen txanda izango da: “Martxoaren 9tik 11ra bitartean egingo diren emanaldietan, eskolan instrumentua ikasten ari diren ikasle gazte zein helduek parte hartuko dute, azken hilabeteotan prestatutako piezak taula gainera eramanez”. 19:00etan hasiko da gaurko kontzertua.
Hiru egunez, lau saio eskaini dituzte, eta denak ere Bermeoko Musika Eskolako audizio gelan egingo dituzte. Udal ordezkariek kontzertuetara bertaratzera gonbidatu dituzte herritar guztiak, eta azpimarratu dute ziklo hori “aukera ona” dela herriko musika eskolako ikasleen lana ezagutzeko eta zuzeneko musikaz “giro hurbil eta atseginean disfrutatzeko”.
Bihar bi saio egingo dituzte. Saxofoi, txelo, tronpeta, piano, trikitixa, gitarra eta bateria ikasleen emanaldia 18:00etan hasiko da, eta 19:15etik aurrera, berriz, gitarra elektrikoa, baxua eta flauta jotzen duten ikasleak igoko dira oholtzara.
Zikloaren azkenengo saioan, txistu, pandero eta piano ikasleak ariko dira; eguaztenean 18:30ean hasiko dute kontzertua.
Antolatzaileek esan bezala, kontzertuetan estilo eta garai askotako piezak entzuteko aukera izango da, “ikasleek errepertorio anitza prestatu baitute”. Hain zuzen ere, musika klasikotik hasi eta rock, pop zein euskal musikara arteko doinuak interpretatuko dituzte, besteak beste, Guns N’ Roses, Coldplay, Nirvana, The Sticks, Survivor, Stevie Wonder, Lady Gaga, Mecano, Benito Lertxundi, The Eagles edo Tchaikovsky bezalako artisten lanak oinarri hartuta.
Nabarmendu dute horrelako emanaldiek “garrantzi berezia” daukatela musika ikasleen prestakuntzan, ikasgelan egindako lana jendaurrean partekatzeko zein oholtzan jotzeko esperientzia eskuratzeko aukera ematen baitiete: “Aldi berean, publikoarentzat aukera paregabea izaten da herriko musikarien lana gertutik ezagutzeko eta askotariko instrumentuen eta estiloen bidez musikaz gozatzeko”.
