Nabarniz Jatetxea
Nabarniz Jatetxeak ateak itxi bazituen ere, Haizea Abadek aita-amaginarreben lanari jarraipena eman nahi eta berriz ere martxan jarri du, "betikoa eskaintzeko, baina begirada gazte batekin".
Argazkia; Nabarniz Jatetxea Menestraren edo indaba gorrien usain soilak Nabarnizera eramango ditu Busturialdeko zein eskualdetik kanpoko herritar asko. Hainbati zuzenean Nabarniz Jatetxea etorriko zaie gogora, 40 urtez asko izan baitira Kontxiren sukaldetik ateratakoak dastatzera hurbildu direnak. Urte luzeko lanaren ostean, erretiroa hartzeko garaia iritsi zitzaion hari ere, eta bere joanagaz itzali ziren lauzpabost hilabetez jatetxeko argiak. Orduan baina, haren erraina den Haizea Abadek, 16 urtetik jatetxeetan lanean ibilitakoa denak, aurrerapausoa eman, eta familia negozioaren ardura beregain hartzea erabaki zuen.
Hala, abenduaz geroztik martxan da berriro ere Nabarniz Jatetxea. Betikoa. “Betikoa eta herritarrek eskatzen dutena” eskaintzera datorrena: “Betiko sistema jarraituko dugu. Gauza batzuk aldatu daitezke, adibidez, kartaz kanpo idi-okela, behi-okela eta arrainen bat ekartzen ari gara, baina oinarrian betikoa izango da: menestra eta indabak ukitu ere ez!”.
Herritarrek zein urte luzez jatetxearen bezero izan direnek ez dute aldaketa nabarmenik igarriko betikoak jatera urreratzen direnean; izan ere, Abadek amaginarrebaren eskutik ikasi ditu sukaldeko sekretuak, eta orain, bera da kozinatzeaz zein jatetxearen kudeaketaz arduratzen dena. Herri txiki baten ezaugarriak jatetxea aintzat hartuta, bariku, zapatu, domeka eta jai egunetan zabaltzea erabaki du Abadek, “herriari bizitasuna ematen” laguntzen dion jakitun baita.
Begirada gaztea.
25 urte ditu Abadek, eta familiak egindako lanari errespetu eta miresmen begiekin begiratzen badie ere, betikoari “begirada gazte bat” gehitu gura dio: “Betikoarekin jarraitzeko nago hemen, baina gaztetasunetik; jatetxea aurrera eramateaz gain, ikuspegi gazte bat eman nahi diot: terraza moldatu, taberna indartu, konbinatuekin jokatu… Azkenean, menestra eta indabak jatera etorri bai, baina inguruko herrietatik ere zerbait hartu eta lasai egotera ere etor daitezen”. Helburu hori lortzeko lehenengo pauso gisa, tabernan berrikuntza bat ezarri dute: konbinatuetarako izotz-makina.
Aukeran, bertokoa.
Sukaldeari dagokionez, “aukeran bertokoa” erabiltzearen aldeko apustua berretsi du Abadek. Are gehiago, posible den kasuetan, etxeko ortukoa erabiltzen duela nabarmendu du, bezeroei “onena” ematea bilatzen baitu. Nabarniz Jatetxeko jangelak 180 lagunentzako tokia du, eta herritarrak bertara hurbiltzera animatu ditu.
Menestraren errezeta
Nabarniz Jatetxea bariku, zapatu, domeka eta jai egunetan zabaltzen badute ere, Haizea Abadek eguenetan ekiten dio jatetxearen menuko izarra den menestra prestatzeari.
- Osagaiak:
Azaloreak
Zerbak
Lekak
Alkatxofak
Barazki-salda
Kuiatxoa
Txanpiñoiak
Urdaiazpikoa
Berakatza
Azenarioa
- Prestaketa.
Hasteko, azalore, zerba, leka eta alkatxofak ur irakinetan egin behar dira, berotasunarekin apurtu ez daitezen. Jarraian, zatitu eta arrautza-irinetan pasatzen dira. Hurrengo egunean, kuiatxoa laminetan moztu eta arrautza-irinetan pasatu behar da, eta txanpiñoiak eta urdaiazpikoa bota. Txanpiñoiak, urdaiazpikoa eta berakatza zartaginetik pasata daudenean, kazola handi batean menestra prestatu edo osagaiak bateratzen hasi behar da: lehenengo azenario eta lekak bota behar dira —lekak zatitu eta erditik moztu, gero apurtu ez daitezen—. Ostean, azalorea jarri behar da —barazkiak hauskortasunaren arabera kokatuko dira, hauskaitzenetik hauskorrenera—; gero alkatxofak eta gainean zerbak. Une horretan kazolak erdi beteta egon beharko luke.Segituan, kuiatxoa ere jarri behar da, eta azkenik, barazki-salda bota aurretik, berakatza, urdaiazpikoa eta txanpiñoiak menestran kokatu.
Barazki-salda egiteko, besteak beste, kipula, tomatea, azenarioa eta berakatza erabiltzea gomendatzen da.Aurkezpena.
Aurkezteko, mahaira atera baino bost-hamar bat minutu lehenago, menestra gainean gari-zainzuriak jarri, erdibituta eta salteatuta.
