Oihana Zubillaga eta Ibon Badiola, errekorreko lasterketaren jabe
San Nikolas jaien egitarau barruan, VI. Kaltzadan Gora lasterketa lehiatu dute gaur [abenduak 6]. III. Igoera Herrikoien Ligako azken geltokia izan da Elantxobekoa. Oihana Zubillagak eta Ibon Badiolak eroan dute lasterketa; Irati Zabalak eta Xuban Muniozgurenek, azken sailkapena, bigarrenez jarraian.
Elantxobeko aldapa malkartsu bezain gogorrak igotzen hasi dituzte San Nikolas jaiak, beste urte batez. 44 korrikalarik portua eta zerua batu dituzte seigarrenez egin duten Elantxobeko Kaltzadan Gora lasterketan. Herritarrak konektatzen dituen lasterketa da gaur (abenduak 6) lehiatu dutena, berezia hainbat arrazoiengandik: herriko kirolari entzutetsuenetako bat izandako Patxi Bengoa omentzen duelako eta Igoera Herrikoien Ligako azkenengo proba puntuagarria delako.
Aurten, gainera, are bereziago bihurtu dute, izan ere, kaltzadaren jabe izan diren Oihana Zubillaga eta Ibon Badiolak errekorra berdindu eta hautsi dute, hurrenez hurren. 9 minutu eta 49 segundoko denbora egin du Zubillagak, emakumezkoen errekorra berdinduz, eta bi segundotan hobetu du lasterketako marka Badiolak: 7 minutuko eta 17 segundoko denboragaz ailegatu da gora. Hori guzti hori, 1,3 kilometro eta 220 metroko desnibela betez lortu dute, bustita zegoen kaltzadan gora eginda.
Korrikalariak bata bestearengandik minutu batera atera dira, portutik herriaren goiko alderainoko erlojupeko saioa egitera, eta emakumezkoetan bigarren denborarik onena lortu du Igoera Herrikoien Ligan sendotasuna erakutsi duen Irati Zabalak: 10 minutu eta 52 segundo behar izan ditu. Malen Alaiogoikoa izan da podiuma osatu duena, Zabalak baino 29 segundo gehiago behar izanda; 11 minutu eta 21 segundoko markagaz biribildu du lehia.
Gizonezkoetan, aldiz, Oier Zubeldia izan da Badiolaren atzetik gelditu den lehenengoa, irabazleak baino 15 segundo gehiago behar izan baitutu lasterketa amaitzeko (7.32). Eta, Oier Etxebarria izan da podiuma osatu duena, 7 minutu eta 41 segundoko denboragaz.
Herrikoen arteko lehian, aldiz, Koldo Basterretxea eta Ainhoa Iriondo izan dira azkarrenak.
Gainera, nagusien lasterketa abiatu aurretik, herri krosean murgildu dira txikienak. Izan ere, udaletxe aurretik elizarainoko tartea bete dute, goizeko giroa berotzearen ardura hartuz eta beraien zein euren familiakoen gorputzak ere martxan jarriz.
Ligan ezustekorik ez.
Azken urteetan bezala, Igoera Herrikoien Ligako azken geltokia izaten da Elantxobeko lasterketa, eta, orain arteko liderrek, Irati Zabalak eta Xuban Muniozgurenek, lidertzei eutsi diete, sufrituta, hala ere. Izan ere, Zabalak emakumezkoen lehian bigarren postua poltsikoratu du, baina Muniozguren atzerago helmugaratu da: 11.a izan da, 8 minutu eta 15 segundoko denboragaz. Biek ala biek ziurtatu dute ligaren azken sailkapenaren garaipena, eta bigarren urtez jarraian irabazi dute, batak zein besteak, Liga. Iaz ere, eurek izan ziren erregularrenak, eta iaz lortutakoa berdindu dute aurten.
Ligako proba guztietan parte hartu dute, eta biak egon dira lasterketeta horietako lehen postuetan. Zabalaren Ligako posturik txarrena bosgarren bat izan da, Tontorramendikoa, eta, aldiz, Elantxobeko probaz aparte, laugarren postua izan da markina-xemeindarraren posturik txarrena. Ondorioz, batak zein besteak izan duten erregulartasun horrek saria jaso du, eta txapeldunen txapela jantzi dute gaur.
Ligako zortzi lasterketetan 378 puntu lortuta nagusitu da Muniozguren, eta, ehun puntu baino gehiago atera dizkio ligan bigarrena izan den Sabin Zenarruzabeitiari; bigarren sailkatuak 249 puntu bildu ditu aurtengo lehian. Eta, estu ibili da bigarren eta hirugarren postuen artekoa aurten, hirugarrena izan den Ander Izagirrek 239 puntu eskuratu baititu guztira, bigarrenak baino 10 gutxiago.
Emakumezkoetan, nagusitasunez gailendu da Zabala, 376 puntu lortuta. Haren atzeetik sailkatu da Haizea Gerrikabeitia, 286 puntugaz. Oizeko eta Lapatzako probak ez zituen lehiatu, eta horrek lehen postuko lehian egotea zaildu dio. Hirugarrena, berriz, Jone Oar-Arteta izan da, 192 puntu bilduta; ez du azken lau probetan parte hartzerik izan, baina, hala eta guztiz ere, podiumeko postua mantentzea lortu du.
Antolatzaileak parte hartzaile kopuruagaz “pozik” agertu dira, izan ere, betiko antzeran ibili dira korrikalariei dagokienean: “Datorren urtean euren markak hobetzeko asmoz geratzen dira batzuk, eta berriro etortzen dira”. Inguruko herrietako korrikalariez gain, aurten urrunagotik ere gerturatu direla adierazi dute antolatzaileek: Bilbotik, Ondarroatik edota Gipuzkoatik.
Seigarrenez antolatu dute lasterketa, eta “lan asko” egin dute. Hala ere, egonkortu den lasterketa dela uste dute antolatzaileek: “Urtero-urtero, antolakuntza aldetik, hobetzen goaz. Aurten pauso bat gehiago eman dugu eta lasaiago aritu gara, hobeto, eta pozik gaude horregatik. Lasterketa berezia da hau, laburra baina gogorra, eta nik uste dut denak oso gustora egon direla. Orokorrean pozik gaude”.
Egun osoko egitaraua.
Nikolas Deuaren ospakizuna goizean goiz hasi badute ere, arratsaldean ere jai giroa izango dute herrian. 18:00etan, Tor Magoaren bisita jasoko dute herriko txikienek kultur etxean, eta gauean, Jaire erromeria taldea arduratuko da Elizabarri ingurua dantzan jartzeaz.
