Sollube Gane Parke Eolikoaren proiektuari alegazioak aurkeztu dizkiote
Bermeoko Udalaren txostenaren arabera, proiektuan ez da Sollube Gabeko proiektu eolikoa garatzeko "inongo justifikazio objektiborik ezta legezko derrigortasunik" biltzen. Bermeoko EH Bilduk ere alegazioak aurkeztu ditu, "herritarren interesen aurka" doan proiektua dela uste dutelako.
Eusko Jaurlaritzako Industria, Trantsizio Energetiko eta Iraunkortasun Sailak sortutako Sollube Gane Parke Eolikoaren proiektuari alegazio teknikoak aurkeztu dizkio Bermeoko Udalak. Zehaztu dutenez, udal teknikariek “sakon” aztertu dute Jaurlaritzaren webgunean argitaratutako dokumentazioa, eta “beharrezkotzat” jo dute alegazioak aurkeztea.
Udalak aurkeztu duen txostenean jaso legez, ez dago Sollube Gabeko proiektu eolikoa garatzeko “inongo justifikazio objektiborik ezta legezko derrigortasunik”. Parke eolikoaren proiektuan, gainera, ez da Sollube Gane ingurumenaren egoera hobetzeko “aukerarik egokiena edo estrategikoena” izatea benetan justifikatzen. Horregatik, udaletik beharrezkotzat dute aurretik proiektua ekimen estrategiko bezala izendatzea, beti ere, inplikatutako erakunde guztien oniritziagaz.
Zehaztu dutenez, proiektua Bermeoko Hiri Antolamenduko Plan Orokorrera egokitu beharko litzateke, parkerako finkatutako eremuan erabilera debekatuen artean baitago lurren mugimenduak egitea, beti ere, “ikusmen edo ingurumen inpakturik sortarazten ez badu”.
Txostenaren arabera, Sollube eta Jata mendien inguruan gauzatu gura dituzten hiru proiektu eolikoek “eragin metagarria” izan dezakete eta horregatik, “beharrezkoa” da horien zarataren eta paisaiaren eragin metagarria “modu bateratuan” aztertzea. Ingurumenari dagokionez, parke eolikoaren obra faserako aurreikusten diren lur mugimendu handiak kontuan hartuta, Ingurumen Zaintza Programan espezie inbaditzaileen gaineko kontrola indartu beharko litzatekeela azpimarratu dute, kenduko beharreko zuhaitzak ordezkatu beharko liratekela zehaztuz.
“Kontrol berezia”.
Sollubeko estazio megalitikoaren balioa eta osotasuna “ez dela behar bezala aztertu” zehazten du udalaren txostenak. Hala, 6-America izeneko SL-02 aerosorgailuaren inguruko lanen fasean “kontrol berezia” ezartzea eskatu dute, inguru horretan dauden balio handiko elementuak ez kaltetzea bermatzeko. Beste gabezia batzuk ere aurkitu dituzte proiektuan, esaterako, kableatuaren zangak izango duen zabalera ez zehaztea: “Horrek zaindu egiten du izan ditzakeen eraginak ebaluatzea”. Halaber, alegazioak Busturialdea Artibaiko Lurralde Plan Partzialaren (LPP) flora, fauna eta paisaiari buruzko zehaztapenak kontuan hartu behar direla gogorarazten dute: “Proiektua, hain zuzen ere, hiru saguzar espezie mehatxaturen interes biziko eremuaren barruan kokatu dute”.
Udalak uste du proiektuak kaltetutako udalerrientzat konpentsazio neurriak ezarri beharko liratekeela, “proiektuaren inpaktua arintzeko eta inguruko komunitateek eragin negatiboen aurrean babes egokia izan dezaten”. Era berean, alegazioak aurkezteko epea etzi [azaroak 12] itxiko dela gogoratu dute, herritar guztiei beraien iritzia emateko gonbita egiteagaz batera. Bide horretan, udaleko ordezkariak Bermeoko auzo alkateekin bilduko dira gaur [azaroak 10], ekarpen eta iritziak jaso, behar diren azalpenak eman eta hurrengo pausoak zehazteko.
“Proiektuaren kontra”
Udal gobernuaren parte den Bermeoko EH Bildu ere Sollube Gane proiektu eolikoaren “kontra” agertu da eta alegazioak aurkeztea erabaki dute: “Jakin badakigu energia berriztagarrien ehuneko altu batera heltzeko, beharrezkoa dela proiektu handien laguntza. Baina Sollube Gane proiektuarekin ezin dugu bat egin gure herritarren interesen aurka doan proiektua dela uste baitugu eta horregatik, alegazioak aurkeztea eta proiektua etetea eskatzea erabaki dugu”.
Energia berriztagarrien eta ondare kultural eta naturalaren alde daudela nabarmendu dute, eta horren egiaztagiritzat jarri dituzte ondarea zaindu eta babestearen asmoarekin egin dituzten lanak. “Energia berriztagarrien alde gaude, eolikoen alde gaude, baina proiektu honetan ez dira auzokideen eta herritarren interesak defendatzen ezta Sollubeko ondare naturala eta kulturala. Hori dela eta, ezin diogu proiektuari gure babesa eman”, azaldu dute EH Bildukoek. Hala, udalaren eta herriko elkarteen alegazioekin bat egiten dute, hainbat puntu gehituta.
Zehaztu dutenez, proiektuko haize sorgailuen kokapena etxebizitzetatik eta herritarrengandik “oso gertu” dago; horrek soinu, bibrazio eta itzal pultsu efektuak (argiaren eta itzalaren txandakatze azkarrak) eragingo lituzke, eta horiek atsedenean, loaren kalitatean eta osasun kardiobaskularrean eragin dezakete: “Zarata kronikoak estres-maila, nekea eta tentsio arteriala handitu ditzake eta bibrazioek buruko minak edo dardara sentsazio iraunkorrak eragin ditzake. Halaber, itzal-pultsu efektuak ikusmen- nekea, zorabioak eta antsietatea eragin ditzake”.
Gogoratu dutenez, Sollube eta Jata mendien inguruan gauzatu gura dituzten hiru proiektu eolikoetako sorgailuak Bermeo, Arrieta, Meñaka, Mungia eta Gamiz-Fikako nukleo bizidunetatik “hiru kilometrotik beherako distantzian” daude, eta baserri eta etxebizitza asko kilometro bat baino gutxiagora: “Horrek, Osasunaren Mundu Erakundeak eta 1367/2007 Errege Dekretuak ezartzen dituzten distantzia eta konfort akustikoaren gomendioak urratzen ditu”.
Era berean, proiektuak paisaiaren izaera natural eta estetikoa “nabarmen hondatuko dituela” azpimarratu dute EH Bildutik, etxebizitzen balioan “eragin negatiboa” izango lukeela zehaztuta. Gainera, haize sorgailuen kokapenak hegazti eta saguzarren populazioan “eragin zuzena” izan dezakeela, eta horrek biodibertsitatea murriztu: “Sai Zuria babestuta dagoen espeziea da eta Solluben ikusi ahal izan da. Bizkaiko Foru Aldundiaren 83/2015 dekretu foralean agertzen den modura, kabiaren eta dorrearen gutxieneko distantzia 10 kilometrokoa izan beharko litzateke eta hori ez da proiektu honetan bermatzen. Gainera, proiektuak inpaktu zuzena izan dezake Bisoi Europarraren babestutako habitatetan”.
Parte hartze eta onura falta.
Sollube Ganeko proiektuaren atzean dauden enpresa eta erakundeek “behar bezalako informazio publikorik” eskaini ez izana salatu dute Bermeoko EH Bildutik, bizilagunei iritzia emateko aukera egokiak ukatu zaizkiela gehituz. Horregatik, “izapidetzea gardena eta garbia izatea eta legedi administratiboa eta ingurumen araudia zorrotz betetzea” eskatzen dituzte: “Proiektuaren ebaluazio-prozesua berrikustea eta herritarren parte hartze handiagoa bermatzea eskatzen da”.
Halaber, proiektuak herritarrentzat zein udalerriarentzat onura argirik ez duela azpimarratu dute. Izan ere, energia ekoizpena kanpora bideratuko da, baina zarata, inpaktua eta arriskuak “herritarren gain” geratuko dira: “Herriak ez du konpentsazio ekonomiko edo sozial egokirik jasotzen, eta proiektuaren ondorioz bizi-kalitatearen galera nabarmena gerta daiteke”. Ondorioz, EH Bildutik Sollube Ganeko eolikoak eraikitzeko proiektuak atzera egin behar duela aldarrikatu dute, sistema berriztagarrien hedapena “ordenatua eta arduratsua” izan behar delako.
