"Hitzez esateko gai ez naizen gauzak adierazteko bidea da musika"
Bizipenak oinarri, eta bere baitan euskararen erabilera berreskuratzeko asmoz, lanean dihardu Enaitz Maguregi Fernandez bermeotar abeslariak. ‘Nire Bihotzan’ abestia apirilean kaleratu, eta horrek izandako "harrera ona" ikusirik, datorrenerako prest agertu da, "ilusio handiz".
Musika txikitatik izan du alboan Enaitz Maguregi Fernandez Magu bermeotarrak. Bere barruko zurrunbiloak aldarrikatzeko modu gisa du abestiak sortzeko prozesua; «benetako abestiak» sortu nahi ditu, eta horretarako, bere bizipenez baliatzen da. Euskal musikaren egoera «osasuntsu» dagoela dio, eta zelan edo halan horren parte izateko borrokatuko du, bere ingurukoen laguntza eta babesa oinarri izanik.
Noiz eta zelan ekin zenion musikaren bideari?
Nire bizitzan beti egon izan da oso presente musika. Aitonak gitarra eta bateria jotzen ditu, eta aitari ere asko gustatzen zaio musika; beraz, nolabait, beti izan dut alboan, eta beti lagundu izan dit une baxuenetan. Nire baitan, ordea, Metalicaren Nothing Else Matters abestia entzun nuenean hasi zen dena. Zerbaitek klik egin zuen nire barruan. Aitonari gitarra eskatu nion, eta 60 urteko gitarra bat eman zidan. Horrekin akorde pare bat probatu, eta abestiko nota batzuk jotzeko gai nintzela ikusita, nire bidea hortik zegoela argi ikusi nuen.
Gogoan duzu jendaurrean lehen aldiz abestu zenuen eguna?
Bai, noski. Ez dut inoiz ahaztuko une hori. Musika eskolako ikasturte amaierako emanaldian izan zen. Lehen aldia zen eszenatokira igotzen nintzena, eta beraz, sentimendu berezi hori sentitzen nuena. Ikaragarria izan zen barruan sentitu nuena. Eskuak dardarka nituen, izerditan nengoen, urduritasunez gainezka; hala ere, sentsazio bakarra da. Pila bat disfrutatu nuen, eta albokoen babesak ere asko lagundu zidan, egia esan. Niregan ezezaguna zen zerbait aurkitu nuen egun horretan. Hainbeste disfrutatzen dudan zerbait jendearekin partekatzea oso berezia izan zen. Beti gogoratuko dut momentu hori.
“Konturatu naiz geroz eta jende gehiagok dakiela ‘Nire Bihotzan’ abestiaren letra”
Zein inspirazio iturriz baliatzen zara abestiak sortzerakoan?
Azken finean, letrak idaztea eta sortzea nire bizitza da. Nire bizipenez baliatzen naiz abestien letrak sortzeko. Hori da nire inspirazio iturria; ni neu. Bizitako une latz zein pozgarriak uztartzen ditut abestietan, benetako abestiak sortzeko. Hitzez esateko gai ez naizen gauzak adierazteko bidea da musika niretzat. Lotsak albo batera utzi, eta nire sentipen eta bizipenak aldarrikatzeko bidea da.
Eta nola definituko zenuke zure musika estiloa?
Edozein estilotako musika entzuten dut. Lehen, nahiko markatuta nuen musika estilo bat, eta hortik aldentzen zen musikari muzin egiten nion. Azkenaldian, ordea, gero eta musika anitzagoa entzuten nabil, eta horrek, nire musika estiloa ere anitzagoa izaten laguntzen duela uste dut. Ze, azken finean, entzuten dudanaz baliatzen naiz, horietako xehetasun bat zein beste nire abestietan gehitzen ahaleginduz, datorrena datorrela. Beraz, esango nuke ez dudala sormen mugarik.
Apirilean kaleratu zenuen Nire Bihotzan, zure lehenengo abestia.
Nire Bihotzan sortzearen bidea polita izan da. Izenak berak dioen moduan, eta lehen esan dudanez, nire barruko sentimenduak kaleratu ditut abestiarekin batera. Eta, egia esan, harrera oso ona izaten ari da; bai herrian, bai nire zirkulu hurbilagoan, feedback itzela eman didate. Eta, gainera, konturatu naiz geroz eta jende gehiagok dakiela abestiaren letra. Niretzat hori oso pozgarria da. Gutxika-gutxika jende gehiagorengana heltzea eta ezagutzen ez nindutenek ere nire eta nire musikaren berri izatea amets bat da niretzat. Bide honetan aurrera jarraitzeko gogoa ematen dit. Guztiz asebeteta sentitzen naiz, egia esan.
Ikusten denez, jendearen babesak garrantzia handia dauka zuretzat.
Bai, eta honetan berria izanik, maitasunez prestatu dudan zerbaitek horrelako harrera izan duela ikusteak ilusioa egiten dit. Eta nola ez, nire ingurukoek uneoro emandako babesagatik oso eskertuta nago. Eurek barik hau ez litzateke posible izango.
“Euskarak musika gozoagotzen du. Euskal musikaren egoera osasuntsu dago”
Euskararen aldeko apustua egin duzu.
Nire ama hizkuntza beti izan da euskara. Eta, egia da, tamalez, azkenaldian horren erabilera nahikoa jaitsi dela nigan. Hori nolabait aldatzeko eta berriz ere nire ahoan euskara lehen aukera izateko asmoz erabaki nuen euskaraz sortzea. Azken finean, nire bizitzako ehuneko handi bat euskaraz bizi izan dut, eta, beraz, bizipenak kontatzeko ere, euskara erabiltzea erabaki dut. Gainera, uste dut euskarak musika gozoagoa izatea ahalbidetzen duela, baita bertoko jendeari zuzenago heltzea ere.
Era berean, euskal kultura sustatzeko modu bat ere bada. Zelako garrantzia du horrek zuretzat?
Garrantzia handia du. Bermeotarra naiz, eta esan bezala, nire parte handi bat da euskara, eta ez nintzen nintzena izango euskara gabe. Beraz, nolabait euskal kultura bultzatzeko modu bat bada hau, eta pozarren nago.
Nola ikusten duzu egungo euskal musikaren egoera?
Osasuntsu ikusten dut. Gero eta musika anitzagoa dago euskaraz, eta uste dut hori oso baikorra dela. Estilo desberdinak jorratzen dituzten talde zein abeslari berriak ari dira musika industriara sartzen, eta gainera, industriak berak tarte handia eskaintzen die.
Bermeoko Andra Mari eta Santa Eufemia jaietan txosnagunean abesteko aukera izan zenuen irailean. Nolako esperientzia izan zen?
Harrigarria izan zen, pasada bat. Esperientzia bakarra. Bermeon, etxean, jotzen nuen lehen aldia zen. Txosna batzordekoek aukera eskaini zidaten, eta pila bat jende hurbildu zen. Ez genuen hainbeste jende espero, inondik inora ere. Beraz, imajinatutako aurreikuspen guztiak gainditu zituen kontzertuak. Amets bat bete nuen.
Eta, hemendik aurrera zer?
Galdera ona da. Gaur gaurkoz, laster kaleratuko den single batean nabil lanean. Horrez gain, grabatzeko dauden hainbat abesti ditut. Lan asko dago aurretik, baina lan egiteko gogorik ez dut falta. Etorkizunak zer emango duen ikusteko eta nire bidean jarraitzeko ilusio handiz nago. Gauza da hori guztia ikasketekin uztartu behar dudala. Baina beno, produkzio musikala ikasten nabil Gasteizen, eta beraz, ez da oztopoa; ikasten dudanaren gehiengoa baliagarria zait nire proiektu musikalean zer edo zer sartzeko.
