Gernika-Lumoko Udalak 141.000 euro inbertituko ditu bide-segurtasuna indartzeko
Gernika-Lumoko Udalak asfaltatze-planaren fase berri bat jarri du abian tokiko bide-sarea berritzeko, eta, aurten, auzoak lehenesten dituela argi esan dute; udalak 141.000 euro inbertituko ditu bide-zorua eta seinaleak hobetzeko, eta bide-segurtasuna indartzeko. Iaz egindako lanei jarraipena emango dien jarduerak izango direla aurreikusi dute; izan ere, 110.000 euroko inbertsioari esker, zolatu eta seinaleztatu egin ahal izan ziren udalerriko hainbat eremu.
“Oraingo honetan, aurrekontua 141.000 eurokoa da eta zoruaren egoera hobetzeko eta, batez ere, bide segurtasuna indartzeko erabiliko da”, azaldu du foru herriko udal gobernuak. Lanak Fray Martin de Murua kalean egingo direla gehitu dute, oro har —58. eta 66. zenbakien arteko zatian—, Zigerta auzoan eta Carlos Gangoiti kalean 55. eta 55 bis zenbakien artean egiteaz gain. Errenteriako hegoaldean ere esku hartuko dutela ohartarazi dute, Zubialde eta Errekazarra kaleetan.
Lanak uda ostean hasiko dira. Aldi berean, udal brigadak seinaleztapen horizontaleko lanak hasi ditu Lorategietan eta Bekoibarran, baita Goikoibarra inguruan ere, oinezko, txirrindulari eta gidarientzako arriskuak murrizteko eta gehien ibiltzen diren zatietan ikuspen handiagoa bermatzeko. Inbertsio honekin, Udalak bere “azpiegiturak egokitzen eta mantentzen” jarraitu nahi du, “erosotasuna eta zirkulazioaren segurtasuna lehenetsiz”.
