Xabi Barandikak "oso zail" ikusten du Lekeitioko Masters Seriesa jokatzea
Gaurko [apirilak 1] aurkezpenean egon bada ere, oraindik ez da Gasteizko lesiotik guztiz osatu. Horrenbestez, ikusteko dago nork jokatuko duen Ion Ibarluzeagaz Unai Lekerika eta Eñaut Urreistiren aurka zapatuan [apirilak 5].
Iaz Lekeitioko Masters Seriesa gizonezkoen Jai Alai Ligako lehen txapelketa puntuagarria izan zen Gernika-Lumoko Winter Seriesaren ostean. Aurten, ordea, emakumezkoen Jai Alai Ligarako ere puntuagarria izango da lehen aldiz. Azken urteetan emakumeen desafioak antolatu dituzte finalaren atarian, baina aurten lehiaketa bera izango dute. Zapatuan [apirilak 5] hasiko da Mastersa lehen bi finalaurrekoekin, apirilaren 12an jokatuko dituzte beste biak eta irabazleek hilaren 17an jokatuko dute finala.
Aurkezpenean egon bada ere, Xabi Barandikak “oso zail” ikusi du zapatuko partida jokatzea. Gasteizen lesionatu ostean, zaintiratu-distentsioa atzeman zioten bere eskuin belaunean eta oraindik ez du bere burua jokatzeko moduan ikusten. Entsegu bakarra egin duela aitortu du, eta bakarka. Gainera, hurrengo egunetan dauka medikua eta bien artean hartuko dute azken erabakia. Ikusteko dago nork ordezkatuko duen gernika-lumotarra.
Gaur [apirilak 1] egin dute aurkezpena, eta bertan izan dira parte hartuko duten puntistetako asko. Elaia Gogenola berriatuarra “pozik” agertu da Lekeitiokoa Jai Alai Ligarako txapelketa puntuagarria izateagatik: “Orain arte finalen aurretik jokatu dugunean, giro bikaina egon da eta aurten ere errepikatzea nahi dugu”. Oaia Otañok ez du uste puntuagarria izateagatik ezer aldatuko denik, “partida guztietan bezala irabaztera aterako gara”.
Maia Goikoetxeagaz bikote berriatuarra osatuko du Gogenolak eta “partidu gogorra” aurreikusten zapatukoa Maite Ortiz de Mendibil eta Frida Watkinsen aurka. “Txapelketa berdindua ikusten dut, ez dut faborito argirik ikusten, azkenean denok oso ondo elkar ezagutzen gara eta horrek partidak gogortzen ditu”. Otaño mutrikuar gaztea lehen aldiz ariko da Lekeitioko Masters Seriesean, bere tokia egin du zirkuituan: “Egia da Durangoko Winter Seriesean, finalean batez ere, ez nuen guztiz nire maila eman, baina aukera berri bat daukat Lekeition eta baliatu nahi dut pixkanaka nire jokoa hobetzeko”. Erika Mugartegirekin jokatuko mutrikuarrak, Ihart Arakistain eta Maialen Aldazabalen kontra. “Bi aurrelariek indar handia daukate, pilota asko atzeratzeko gaitasuna dute, beraz, atzelarien artean ondoen eusten duenak irabaziko du”, esan du gazteak.
Hutsuneak
Arituko ez dena Arai Lejardi izango da, Jai Alai Ligako liderra, orain arteko hiru txapelketak irabazi ditu. Gizonezkoetan beste hutsune nagusietako bat Mikel Mantzisidor iazko Lekeitioko txapeldunarena da.
Zapatuko finalaurrekoan Gasteizen txapela janztetik datozen Eñaut Urreisti eta Unai Lekerika izango dituzte aurkari. Winter Seriesa irabazi ostean, atseden hartuta, ostera ere gogotsu agertu da markina-xemeindarra: “Urreisti eta Lekerika oso ondo elkar ulertzen dute eta ez da erraza izango zuloak aurkitzea”. Baldintza hori ziurtatu du gernika-lumotarrak eta Santi Brouard pilotalekua haien ezaugarrietara “ondo” egokitzen dela esan du. “Frontoi bizia da eta nire eskumagaz min handia egin dezakedala uste dut. Aurrelaria edozein dela ere, Ibarluzeak bi urte daramatza jarraian Winter Seriesa irabazten eta atzelari oso serioa da. Konfiantza askogaz gatoz eta gure maila emateko intentzioagaz”, aitortu du.
“Frontoi bizia da eta nire eskumagaz min handia egin dezakedala uste dut”
Ispastertarra izanik eta Lekeitioko zesta punta eskolan ikasirik, “berezia” da Aritz Erkiagarentzat Lekeitioko Mastersa. Jokatzen duen txapelketa guztietan bezala, gainontzeko puntistek Erkiaga jarri dute faborito bezala. Are gehiago kontuan hartuta Gorka Sorozabalegaz bikote osatuko duela. Finalean egon nahi du ispastertarrak Lekeition Eguen Santuan sortzen den giro bikainaz jakitun. Horretarako, berriz, Johan Sorozabal eta Julen Del Rio mendean hartu beharko dituzte. “Gorkaren lehen aldia da Lekeition, frontoi bizkorra da, errematatzeko egokia, jendea oso gainean dagoelako eta Johanek eta Del Riok pilota arina erabili nahiko dute min egiteko”.
Erkiagak Jai Alai Ligarako hasieratik puntuak pilatzearen garrantzia nabarmendu du, “gero berreskuratzeko aukerarik ez dagoelako. Hain zuzen ere, Lekeitiotik aurrera ia udako sasoian sartuko dira puntistak Iparraldeko zirkuitua ere martxan jarriko delako. Lekeitioko Masters Serieserako bonoak eta sarrerak salgai daude dagoeneko.
Egutegia:
Apirilak 5, 19:00etan:
- Elaia-Maia VS Maite-Frida
- Barandika-Ibarluzea VS Urreisti-Lekerika
Apirilak 12, 19:00etan:
- Ihart-Maialen VS Erika-Oaia
- Erkiaga-Gorka VS Johan-Del Rio
Apirilak 17, 17:00etan:
- Finalak (ETB)
