Sukaldari ez profesionalek ere parte hartuko dute Arrain Azokako pintxo lehiaketan
XXXI. Arrain Azokaren atarian, Arrain Azoka Elkarteak tabernen arteko eta lagunarteko pintxo txapelketak antolatu ditu. Profesionaletan 11 tabernak parte hartuko dute, eta herritarrek zeresana izango dute pintxo finalistak aukeratzeko orduan. Bi txapelketatako finalak maiatzaren 16an izango dira, Arrain Azokako barikuan.
Atzerako kontaketa hasita daude Bermeon, izan ere, hilabete eta erdi inguru falta da maiatzaren 16tik 18ra bitartean udalerriak hartuko duen XXXI. Arrain Azokarako. Data iritsi bitartean baina, hamaika ekintza izango dituzte herritarrak aukeran, hala nola Arrain Azoka Elkarteak antolatutako tabernen arteko pintxo txapelketa eta lagunarteko pintxo txapelketak. Bermeoko Udaletik nabarmendu dutenez, lehiaketa batean zein bestean “arrainaren zapore paregabea eta euskararen indarra” izango dira nagusi, besteren artean azokak Euskaraldiaren lehen asteburuarekin bat egingo duelako.
Profesionalen pintxo txapelketan 11 tabernak eman dute izena: Batun Batun, Talako kantina, Joshe Mari, Kai Alde, Artza, Akelarre, Eguzki, Toki Alai, Andeko eta Beti Ondo. Parte hartzaileek apirilaren 11n [barikua] izango dute lehen hitzordua, 18:00etan, udal azokan. Bertan aukeztu beharko dituzte txapelketara aurkeztu gura duten pintxoa.
Herritarrek baina, apirilaren 12tik [zapatua] 27ra [domeka] izango dute pintxo horiek dastatu eta euren ustetan onena denari botoa emateko aukera. Bi aste horietan zehar, pintxoak eskuragarri egongo dira, 12:00etatik 14:00etara bitartean, bermeotarrek pintxo irabazlea aukeratzen lagundu dezaten. Herritarrek beraien epaia QR kode baten bidez eman ahal izango dute, galdetegi erraz bat erantzunez. Hala ere, nahiz ete herritarrek zeresana izan, pintxo finalistak aukeratzeko “herritarren bozkak eta epaimahai profesionalaren ebaluazioa” uztartuko direla jakinarazi dute. Finalean izango diren pintxo eta tabernak apirilaren 29an [martitzena] ezagutuko dira.
Ez profesionalen lehia.
Edozein zaleturi ateak zabaldu asmoz, Arrain Azoka Elkarteak lagunarteko pintxo txapelketa ere antolatu du, eta parte hartzeko bi baldintza bete beharra baino ez dute izango herritarrek: 18 urtetik gorakoak izatea eta sukaldari profesionala ez izatea. Gainera, izena eman gura dutenek bakarka zein taldeka (lagunak, txokoak…) egiteko aukera izango dute. Horretarako azken eguna apirilaren 22a [martitzena] izango da, eta Bermeoko Turismo Bulegoan egin beharko da — turismoa@bermeo.eus edo 94-617 91 54—.
Lehenengo proba apirilaren 24ean [eguena] izango dute, udal azokan. Bertan prestatu beharko dituzte lehiaketara aurkeztuko dituzten pintxoak, eta udaletik jakinarazi dutenez, parte hartzaileek gasezko su txikiak izango dituzte eskuragarri, behar izanez gero erabiltzeko. Arrain Azokari begirako lehiaketa izanik, txapelketan parte hartzeko arau nagusi bat jarri dute antolatzaileek: pintxoaren osagai nagusia arraina izan beharko da. Finalera igaroko diren hiru pintxo onenak aukeratzearen ardura epaimahai profesional baten esku geratuko da. Pintxo txapelketako oinarri edota informazio gehiago nahi duenak turismo bulegoan eskatu dezakela zehaztu dute udaletik.
Gastronomia eta kultura uztartuko dituzten bi txapelketetako finalak egun berean lehiatuko dira: Arrain Azokako barikuan [maiatzak 16], 18:00etan. Bertan erabakiko da zeintzuk diren bi pintxo onenak.
Arrain Azoka, euskaraz.
Aipatu bezala, XXXI. Arrain Azokak Euskaraldiaren lehen asteburuagaz bat egingo du, eta udaletik azpimarratu dutenez, Arrain Azokako “egitarau osoa euskaraz izatea da helburua”. Horregatik, pintxo txapelketa ere euskarari lotuta egingo da, eta parte hartzaileek pintxoen aurkezpenak euskaraz egin beharko dituzte. Horretarako gaitasun edo ezagutzarik ez dutenek itzulpen zerbitzua izango dute eskuragarri aurkezpena bideratu ahal izateko.
Udaletik herritar guztiei zabaldu die txapelketetan parte hartzeko deia, bai pintxoak dastatzera, bozkatzera zein sukaldean dituzten trebetasunak erakustera: “Giro paregabean, euskaraz eta gastronomiaz gozatzeko aukera ezin hobea dugu aurretik”.
