Lehen legebiltzarkideak omendu dituzte, 45 urteren ostean
Eusko Legebiltzarraren 45. urteurrenean, lehen legealdiko legebiltzarkideak omendu dituzte gaur [martxoak 31], Gernikako Batzarretxean.
1980ko martxoaren 31n gertatu legez, Gernikako Batzarretxean elkartu dira gaur [martxoan 31] Eusko Legebiltzarraren lehen legealdiko legebiltzarkideak, Eusko Legebiltzarraren 45. urtemugaren ekitaldi nagusian. Egungo legealdia osatzen duten legebiltzarkideak ere bertan izan dira, baita 45 urteko bidean Eusko Jaurlaritzaren lehendakari nahiz sailburu izandakoak ere, tartean, egungo lehendakari Imanol Pradales.
Gernikako Arbolaren gerizpean abiatu dute ekitaldia; bertan egin diete ondoetorria lehen legealdiko legebiltzarkideei, eta ohorezko aurreskua dantzatu zieten. Ondoren, Batzar Aretora sartu ziren, Gernikako Arbola abestu bitartean. Barrualdean, irudi historikoen proiekzioarekin eman diote jarraipena egitarauari, lehen legebiltzarkideek eta zendutakoen senideek Eusko Legelbiltzarraren 70 dominak jasotzeko unea iritsi arte. Legebiltzarraren egungo presidente Bakartxo Tejeriak banatu dizkiete dominak.
Hain zuzen ere, Tejeriak eskerrak emanez ekin dio bere esku hartzeari: “Euskal Herriarekiko izandako konpromisoagatik, geure historiaren une hain esanguratsuan”. Egungo Euskal Herriaren “oinarriak eraiki zituen belaunaldia” omentzeko eguna dela azpimarratuta, belaunaldi horren “balioak eta irizpideak” goraipatu gura izan ditu: “Askatasuna, demokrazia, geure nortasunaren defentsa, berdintasuna, justizia, bizikidetza eta bakea; irizpide horiek gidatu dute Eusko Legebiltzarra, 45 urteko bidean”.
Mikel Urdangarinen emanaldiagaz biribildu dute ekitaldia. Musikari zornotzarrak ekimenerako beren-beregi hautatuko hiru abesti interpretatu zituen Batzarretxean: Herri zaharra, Kideari eta Mundua eder.
Lehen parlamentuari buruz.
1980ko martxoaren 9an egindako hauteskundeen ondorioz jabetu ziren beraien karguaz, urte horretako martxoaren 31n, lehen legebiltzarkideak. Juan Jose Pujana izan zen hautatutako lehen presidentea. Apirilaren 9an bildu ziren berriro, Eusko Jaurlaritzaren lehendakaria aukeratzeko: hura gaurko ekitaldian ere egon da Carlos Garaikoetxea izan zen.
Eusko Legebiltzarraren lehen lantaldeak “hainbat arazori” aurre egin behar izan ziola nabarmendu dute gaurko agerraldian, “tartean, Tejeroren estatu kolpeari, 1983ko uriolei, atentatuei edota Euskal Herriak bizi zuen egoera ekonomikoari”.
Talde hark onartutako legeei dagokienez, besteak beste, euskararen erabileraren normalizazioari, Euskal Irrati Telebista erakunde publikoaren sorrerari, Euskal Ikastolen Erakundeari, Ikastolen Estatutu Juridikoari edota Eusko Jaurlaritzari buruzkoak izan ziren. Horietako askok “traza sozial agerikoa” dutela argitu zuten.
Argazkiak: Irekia.
