Bermeoko Euskaraldiak baditu bere enbaxadoreak
Bermeoko hamaikakoaren aurkezpena egin zuten atzo, Lameran. Euskaraldiaren enbaxadore izango diren 15 pertsonak herritarrek egindako proposamenetatik atera dira.
Bermeoko Euskaraldiaren hamaikakoaBermeoko Euskaraldia Lameran zuten hitzordua bermeotarrek atzo eguerdian [martxoak 30], eta ez zuten hutsik egin. Jende asko batu zen Bermeoko Euskaraldiaren hamaikakoa nortzuk osatuko zuten ezagutaraziko zuen “ekitaldi alai eta bizian”.
Josepa Kale Kale eta Kanta Kanta Lorue taldeak arduratu ziren hasiera batean ekitaldia girotzeaz, eta Ross Dantza Eskolakoek hartu zieten lekukoa gero. Inork ez zuen hitzordua galdu nahi izan, eta Bermeoko Erraldoien konpartsa, MB2000koen txokoa edota Chris O’Shea biolinjolearen emanaldia ere ez ziren falta izan.
Hamaikakoaren berri eman aurretik, Berton Bermeoko merkatari elkarteko ordezkariak oholtzaratu ziren, Euskaraldian parte hartuko duten entitate ezberdinen izenean. Ordezkariok euskara “normaltasunez” bizitzeko egunerokotasunean bisitatzen diren toki eta zerbitzuek (lantoki, denda, taberna…) duten garrantzia nabarmendu zuten.
Hamaikakoa.
Euskaraldiaren hamaikakoa osatzen duten pertsonek bai beraien inguruan, bai herrian zehar Euskaraldiaren berri emateko ardura izango dute. Enbaxadoreak aukeratzeko herritarrak entzun gura izan dituzte Bermeon, eta 250 lagunen proposamenak bildu dituzte, guztira “ehundik gora izen”.
Hala, jatorri, adin, lanbide… askotakoak izango dira aukeratutako hamaikakoa osatuko dutenak: Ramon Basaldua (kazetaria), Janire Bilbao (kantinaria), Anka Androni (guraso errumaniarra, irakurle txokoaren partaidea), Eneko O´Rourke (irlandar, Bermeon euskaraz ikasten ari da), Izaskun Bilbao (irakaslea), Garoa Martinez (kirolaria, halterofiliako txapelduna), Orsola Casagrande (kazetaria eta nazioarteko aktibista), Helen Mugabekazi (euskara ikasten ari den Ruandako medikua), Alex Duque (sukaldaria), Irune Astiazaran (gazte mugimenduko kidea), Gentzane Uriarte (dantzaria), Jose Luis Bilbao (jubilatua eta ekimen ezberdinen militantea), Iñaki Olano (musikaria) eta Mikel Jauregizar (futbolaria).
Euskaraldiare hamaikakoaren aurkezpen, BermeonBermeoko Euskaraldia
Azken hiru enbaxadoreak ezin izan ziren aurkezpen ekitaldian egon, baina Jauregizarrek mezu bat helarazi zien herritarrei: “Ahobizi rola hartzen dut, baina ez bakarrik Euskaraldiko egunetan; urtean zehar egunero saiatzen naiz ahobizi izaten, bai inguruko jendearekin bai sare sozialetan. Uste dut denok garela beharrezkoak euskarak aurrera jarraitzeko, bai ahobizi garenak bai belarriprest direnak, prest daudelako gu euskaraz entzuteko”.
Ekitaldiarei Iker Uriartearen bertsoekin eta O´shearen emanaldiagaz eman zioten amaiera. Antolatzaileek, berriz, Ahobizi edo Belarriprest rolak hartu eta Euskaraldian izen ematera animatu zituzten herritarrak, Euskaraldiaren antolakuntzan parte hartzeko gondidapena egiteagaz batera.
