Argizagi Saria jaso du Naia Laso skaterrak
Bizkaiko Foru Aldundiak Bizkaia Kirolak 2025 Sariak eman ditu, lurraldean oinarriko kirolak egiten duen lana aitortzeko. Hala, Argizagi Saria eman diote Naia Lasori, Bizkaiko klub batean federatuta kategoria absolutuan lehiatzen direnen lana aitortzen duena.
Bizkaia Kirolak Sarietan saritutakoen talde argazkia. Bizkaiko Foru Aldundia Naia Laso skater bermeotarrak Bizkaia Kirolak Sarietako Argizagi Saria jaso zuen atzo (martxoak 24), Bizkaiko Foru Aldundiaren eskutik, eta haren ordez bere amak jaso zuen Lasoren lana aitortzen duen ikurra. Hain zuzen ere, Bizkaiko klub batean federatuta kategoria absolutuan lehiatzen direnen lana aitortzen duena saria jaso zuen skaterrak.
Kirol merezimenduen aintzatespenak egiteaz gain, kirol ibilbidea aitortzen duten sariak ere banatu zituzten atzokoan. Eta, horien artean, Bizkaiko kirol erakundeetan zuzendaritza postuetan dauden edo egon diren Bizkaiko pertsonei zuzendutako Leialtasun Saria eman zioten Santi Zumaran Lekittarraren ohorezko presidenteari. Isuntza Arraun taldekoek Zumaran zoriondu eta eta harek taldearen alde egindako lana eskertu diote: “Eskerrik asko gugatik egin duzun denagatik, guztiz merezitako saria da”.
Denetara, bederatzi sari banatu zituzten, hainbat kategoriatan: aipatutakoez gain, Markel Fernandezek (Izar Gaztea Saria), David Alonsok (Iparrizar Saria), Zuazo Eskubaloi Taldeak (Ostadarra Saria) Jose Maria Rodriguez de la Herak (Zuzentasun Saria), Jorge Dueñas de Galarzak (Lidergotasun Saria), Sociedad Deportiva Amorebietak (Kidetasun Saria) eta Euskalgymek (Ikusgarritasun Saria) jaso zituzten aitortzak.
Zuzendaritzetako emakumeen lana.
Kiroleko zuzendaritza postuetan emakumeek egiten duten lana aintzatesteko edizioa izan da aurtengoa, emakumeen lana agerian jartzea bilatzen zuena. Hori dela eta, sariak taldeen zuzendaritza karguak betetzen dituzten emakumeek banatu zituzten, eta Bizkaia Kirol Sariaren ohorezko aitortza Ana Urkijori eman zioten, Athletic Clubeko presidente ohiati, lehen mailako kirol zuzendaritzan egindako ibilbideagatik.
“Ana da gaur egun sendotik zabaldu eta asfaltatu behar dugun bidea ireki zuten emakume horietako bat, kirola ere erabateko berdintasun gunea izan dadin. Guztioi dagokigun lana da kirola emakumeek beren gaitasun gutziak garatzeko gune bihurtzea”, esan zuen Elixabete Etxanobe Bizkaiko Ahaldun Nagusiak.
