Palestinarren erresistentzia eskubidea babestea aldarrikatu dute
Busturialdeko Kontseilu Sozialistako kideek salatu dute Israelek su etena "behin eta berriro urratu" duela eta herrialde batzuek Israelen defentsarako eskubidearen izenean genozidioa "justifikatzen" dutela.
Busturialdeko Kontseilu Sozialistak deituta, elkarretaratzea egin zuten bariku iluntzean [martxoak 21] Gernika-Lumon. Palestinarren erresistentzia eskubidea “inolako ekidistantziarik barik” babestea aldarrikatu zuten, baita mendebaldeko enpresen, instituzioen eta alderdi politikoen konplizitateari aurre egitea ere, Israelekin harremanak eteteko.
Era berean, beharrezkotzat dute nazioartean kapitalismoari eta gerrate inperialistari kontra egingo dien langileen indar iraultzailea antolatzen hastea: “Israelek existitzen jarraitzen duen bitartean, sarraskia eta heriotza hedatzen jarraituko du Ekialde Hurbilean. Palestinaren askatasuna estatu sionistaren desagerpenetik baino ezingo da etorri. Basakeria sionista ez da bere kabuz geldituko, eta guk ere ezin dugu geldirik egon. Palestinarren erresistentzia mundu osoko langileontzat eredugarri izaten ari den honetan, jarraitu dezagun kaleak hartzen Palestinaren alde eta gerra inperialistaren kontra”.
“Israelek palestinar herriaren kontrako genozidioagaz eta kolonizazio planagaz jarraitzeko asmoa dauka, eta nazioarteko zuzenbideak ere argi utzi du ez duela sarraskia geldituko”
Kontseilu sozialistako kideen irakurketan gogoratu zuten urtarrilean sinatutako su etena Israelek “behin eta berriro urratu” duela, eta Israelen jarrera eta jokabidea salatu zituzten, hainbat adibide zerrendatuz. Adierazi zuten Ramadan hilabetean egindako erasoak “Israelen izaera terrorista berriro ere agerian” uzten duela: “Estatu supremazista horrek ez du akordiorik nahi, eta palestinar herriaren kontrako genozidioagaz aurrera jarraitzeko asmoa dauka; kolonizazio planagaz jarraitzeko asmoa dauka, eta batzuek ozen aldarrikatzen duten nazioarteko zuzenbideak ere argi utzi du ez duela sarraskia geldituko”. Elkarretaratzean zehaztu bezala, Israelek behin eta berriro erakutsi du ez duela akordiorik errespetatuko, eta, beraz, Busturialdeko Kontseilu Sozialistako kideen iritziz, su etena ez da irtenbidea: “Israelen izaera kolonialistagatik ezinezkoa izateagaz gain, sozialdemokraziak defenditzen duen bi estatuen irtenbideak gatazkaren erroa estali eta estatu sionistaren existentzia zilegitzen du”.
Era berean, beste behin, AEBren zein Europako hainbat herrialderen konplizitatea kritikatu zuten: “Ameriketako Estatu Batuen funtsezko aliatua da Israel, eta palestinarren garbiketa etnikoaren alde ere bi bazkideak bat datoz. Europako Batasuna guztiz lerratuta dago oligarkia atlantistaren interesekin, eta, beraz, estatu sionistarekin ere bai, eta gogoratu behar dugu Europako Batasuna dela Israelentzako arma esportatzaile nagusietako bat”. Ildo horretatik azaldu zuten zenbait herrialdek ez dituztela eten harreman diplomatiko, ekonomiko zein militarrak Israelekin, eta horiek guztiek “ahalbidetzen dutela” palestinarren kontrako genozidioa: “Herrialde batzuek Israelen defentsarako eskubidearen izenean genozidio hau justifikatzen duten bitartean, beste batzuek, Espainiako gobernuak adibidez, Palestinaren aldeko mezu hipokritak zabaltzen dituzte sarraskia gelditzeko inolako neurri eraginkorrik hartu barik”.
