'Herri libre bat' mobilizazio nazionala aurkeztuko dute Gernika-Lumon
Elai Alai aretoa aldarrikapenez beteko dute barikuan (martxoak 21); Gure Eskuk ekainaren 7an, Bilbon, 'Herri libre bat. Elkarrekin. Erabaki' lelopean antolatutako mobilizazio nazionala aurkeztuko du.
Argazkia: Gure Esku. Gure Eskuk Herri libre bat mobilizazio nazionala antolatu du ekainaren 7rako (zapatua); hori aurkezteko eta mobilizazioaren inguruko nondik norakoak zehazteko agerraldia egingo du martxoaren 21ean (barikua), 18:30ean, Gernika-Lumon. Elai Alai aretoa aldarrikapenez beteko dute, alegia, barikuan. Herri libre bat dinamikak “emozioa” sortu behar duela nabarmendu dute Gure Eskuko kideek, eta dinamikaren helburuen artean “adierazpeneko edukien baitan herri oso baten posizionamendu politiko bat lotu eta horren irudikapena mobilizazio batean irudikatzea eta aldarrikapen zehatzak mahai gainean jartzea” daudela azaldu dute.
“Maila sozialean egin dezakegun ekarpenik eraginkorrena herri gisa, lurralde bakoitzaren estatus politikoan eta guztien arteko lankidetzan aurrerapauso berri eta esanguratsuak emateko baldintzak, giroa, eta beharrezko ilusioa parte izango da”, gaineratu dute, halaber, dinamikarekiko. Herri libre bat. Elkarrekin. Erabaki. Horiek izango dira plazaratuko dituzten aldarrikapenak, eta horregatik aukeratu dute lelo hori, esan dutenez.
“Indar ideiak” ere helarazi dituzte Gure Eskutik. Herri bat gara. Euskal Herria gara dute lehen indargunetzat: “7 lurraldeko herria gara, eta horrela aurkeztu nahi dugu munduaren aurrean. Hemen herri berezitu bat dago, autogobernatua izan nahi duena; hizkuntza, kultura, eta ohitura propioak dituena. Eta hori dena harrotasunez bizi duena”. Erabakitze eskubidearen alde ere egingo dute Herri bat gara dinamikarekin, eta horrela jakinarazi dute. Izan ere, Euskal Herriak, herri gisa, “mundu mailan dauden erronka globalei erantzuteko burujabetza osoa” behar duela lehenetsi dute: “Erabakitzeko eskubidea praktikara eraman behar dugu, burujabetza eremuak eskuratzeko, eta herri burujabe bihurtzeko”.
Horrez gain, “herritarron garaia” dela aldarrikatu dute. “Parez pare daukagun aukera probestu eta herri gisa jokatzeko” unea dela azpimarratu dute, bere gain. “Momentu historiko honetaz jabetu behar gara, eta uneak eskatzen duen mailan jokatu behar dugu”, aurreratu dute Gure Eskuko kideek. Hori guztia sakondu, eta ekainaren 7ko hitzordua gogoratuko dituzte eguenan, arratsaldeko 18:30ean, Elai Alai aretoan. Izan be, ohartarazi dute Bilboko La Casillatik hasiko dela ekainak 7ko mobilizazio nazionala, 17:30eatik aurrera.
