Denboran hamar urte atzera egiteko aukera
Txutxuk Back to 2015 jaialdia antolatu du zapaturako [martxoak 22], Astran. Duela hamar urteko iruditerian oinarrituko dute egitaraua, eta sarrerak dagoeneko salgai daude, hiru eurotan.
Txutxuk Back to 2015 jaialdia antolatu du. Datorren zapatuan [martxoak 22], Gernika-Lumoko Astra kultur faktoria duela hamar urteko iruditeriagaz hornituko da. Herriko lagunarteen arteko komunikazioa sustatzeko asmoz prestatu dute jaialdia, batez ere, “ohiko datetatik kanpo“: “Egiteko ezer berezirik gabeko neguko asteburu buruzuri bati kolorea ematea da asmoa, zer edo zer berezia eskainiz”. Duela urte bi Back to 2000’s jaia egin zuten, 2000ko hamarkada oinarri: “Emaitza aparta eduki zuen jai hark, eta jendearen erantzuna egundokoa izan zen; hori dela eta animatu gara bigarren hau prestatzera”.
Denetariko gaiak mahai gainean eduki dituzten arren, 2015era bueltatzea “mundiala” izan daitekeela uste dute: “2015. urtea hurbil samar dagoela dirudi, baina jadanik hamar urte luze igaro dira; jaialdi guztia sasoi hartako irudiz jantziko dugu, eta aldi hartako musikaz girotu. Era berean, gazteei tarte hartako arropak armairutik ateratzeko eskatu gura diegu, eta mozorrotzera animatzeko”.
20:00retan ekingo diote egitarauari. Aurreratu dutenez, DJ sesio bana nabarmenduko dira: DJ Zilarra t’beruna ariko dira lehendabizi, 22:00etan; 00:05ean, aldiz, DJ Tripletzen txanda izango da. Azken aldian, Zazpizar erromeriak jo zuen; Astrakoa izan zen, hain zuzen ere, taldearen lehen urratsetako bat: “Jotzeko eskatu ziguten, hasten baitzebiltzan; guk gustura asko eman genien baiezkoa, eta gerora bere bidea abiatu zuten. Aurten, denboraz justuxeago ibili gara eta, beraz, DJ-en alde egitea erabaki dugu”.
Hasierako egitarauan sartu ez arren, arrastian euskarazko rap saio herritarra egingo dute
Arinago, baina, egitarauan islatu ez duten ekimen “berezi” bat egingo dute: “Eskarazko rap txapelketa edo saiotxoa egingo dute herriko gazteek. Astran arinago egindako zerbait da, ezaguna; gainera, orain arte Txutxurengandik apur bat urrun ibilitakoak hurreratzeko ere balio dezake zelanbait. Kide bi arduratuko dira gidari beharrak egiteaz. Interesa dutenek dagoeneko izena eman dezakete, Txutxuren sare sozialetara jota; egunean bertan animatzen direnak ere ondoetorriak izango dira”.
Gauerdian ailegatuko da egitarauko gailurretako bat: Mannequin Challenge modura ezagun bihurtutako maniki desafioa egingo dute. “Duela hamar urte boladan egon zen halakoak egitea, eta aurtengoan tankerako zerbait egitea dugu buruan”. Halaber, gaualdi osoan zehar “bestelako lehiatxoak” egitea ere aurreikusten dute: “Batik bat, ur botila zutik jartzeko jokoa edota floor is lava izenekoa egingo ditugu”. Bestalde, jan-edana ez dira faltako: “Astrako ezkatzean ogitartekoak eta unean bertan jateko afaria prestatuko dugu. Hala, inora lekualdatu barik, aukera egongo da bertan afaltzeko; jana nahiz edana ez dira faltako”.
Arranon eta Katun lor daitezke sarrerak; barikuan eta zapatuan, ostera, Astran bertan, edukiera bete baldin ez bada
Sarrerak lortzeko.
Antolatzaileek nabarmendu dute sarreren salmenta “bide onetik” doala: “Herritarrak sarreren salmentari buruz galdezka aritu zaizkigu eta, horrenbestez, interesa dutela ulertzen dugu”. Txutxuko lantaldea Astrako barran egongo da barikuan [martxoak 21], eta zapatuan [martxoak 22]; egun bietan ala bietan bertan lortu ahalko dira, edukiera bete bitartean. Arinago, baina, Gernika-Lumoko Arrano zein Katu tabernetan ere erosi ahalko dira sarrerak. Hiru euroko prezioa edukiko du bakoitzak. Antolakuntzak herriko gazteei “Astrara bertaratzeko deia” luzatu die: “Ondo pasatzeaz eta denboran atzera egiteaz gain, udalerriko gazteak saretzeko eta guztiek elkar komunikatzeko egun aproposa izango da”.
