Ikasturteko bigarren Mintzodromoa jorratuko dute eguenan
Otsaileko Mintzodromoaren arrakasta ikusirik, eguenan (martxoak 20), berriro ere euskara izango da nagusi Astran. "Denetariko gaiei buruz lasaitasun osoz" hitz egiteko aukera izango dute Gernika-Lumoko Berbalagunek antolatutako hitzordura hurbiltzen direnek.
Otsailean egin zuten ikasturteko lehenengo Mintzodromoa. Gernika-Lumoko Berbalagunek, “aurrekoaren arrakasta ikusita”, bigarren hitzordu berezia prestatu dute eguenerako [martxoak 20]: Mintzodromoa. Euskaraz “denetariko gaiei buruz lasaitasun osoz” berba egitea du xedetzat egitasmo horrek. Aurrekoa, otsailean burutu zuten, eta horren balorazioa “oso positiboa” izan zenez, ikasturteko bigarren bat ere prestatu dute. Astra kultur faktorian izango da oraingoan ere, 10:00etan hasi eta 11:30eara arte. Mintzodromoa antolatzen jarraitzearen helburuak asko direla adierazi dute Gernika-Lumoko Berbalagunek: “Alde batetik, euskararen eguneroko erabilera sustatzea bilatuko dugu; bestetik, saretzea edukiko dugu helburu, hau da, parte hartzaileen arteko ezagutza nahiz zubi lana bultzatzea”.
Antolatzaileek nabarmendu dutenez, aurretiaz izena eman beharko da. Horretarako, WhatsApp bidez mezu bat idatzi beharko da, 600 48 20 10 telefono zenbakira. “Kopuruari dagokionez, hogei bat parte hartzaile izatea aurreikusten dugu. Izan ere, berriro ere, Foruko Barnetegiko, Aita Villasante euskaltegiko eta AEK-ko ikasleak izango ditugu, Berbalaguneko kide batzuez gain”, gaineratu dute antolatzaileek. Era berean, herritarrei, beraien profila edonolakoa izanik ere, animatzeko eta parte hartzeko deialdia luzatu diete, “euskaraz ondo pasatzeko” aukera dela azpimarratuz.
