Australiara joandakoen historia Nabarnizera ailegatu da
Euskal Australiar Elkartearen 'Basques in Australia' erakusketa Nabarnizko elizara ere ailegatu da. Australiara joandako euskaldunen bizipenen aurkezpena da erakusketa, eta asteburuan bisitatu ahalko da.
Munduan zehar bidaiatu eta gero, Ereñotik Nabarnizera ailegatu da Euskal Australiar Elkarteak Australiara joandako euskaldunen testigantzak jasoz osatutako Basques in Australia erakusketa. Elizan kokatu zuten bilduma joan den asteburuan, herritarren interesa piztuz, eta zapatuan eta domekan ere bisitatu ahalko da, 18:00etatik 20:00etara eta 11:30etik 14:00etara, hurrenez hurren.
Euskaldunek Australiara bidaiatu izanaren arrazoiak zein euren bertako bizimoduaren nondik norakoak kontatzen ditu erakusketak: bidaia bera, jatorria, helmuga, hango bizimodua, ogibideak, kultura edota emakumezkoen zein gizonezkoen egoeren arteko aldeak.
46 elkarrizketaren emaitza da erakusketa, denetariko argazkiekin hornituta dagoena. “Bidaia da abiapuntua, eta aisialdia, berriz, helmuga; bien bitartean, denetariko informazioa dago”, diote erakusketaren antolatzaileek.
Besteren artean, emakumezkoetan jartzen du arreta bildumak. Izan ere, Espainiako eta Australiako gobernuek, Eliza Katolikoagaz batera, Marta Plana sinatu zuten eta, haren bitartez, 1960tik 1963ra hainbat emakume joan ziren Australiara.
Aisialdiari ere dagokion tartetxoa eskaintzen dio erakusketak. Argazkiek bistaratzen dute orduko euskaldun australiarrak zelan biltzen ziren etxalde, hotel hondartza edo erreka bazterretan, baita Trebonneko pilotalekuan ere.
Erakusketa ikustera joateko deia egin dute antolatzaileek, ingurutik hanbait herritar Australiara joan ziren-eta.
