Liderraren kantxara, "galtzekorik barik"
FIBA Leihoetako geldialditik sendo itzuli da Lointek Gernika Bizkaia, Celtari eta IDK Euskotreni jarraian irabaziz. Zapatuan (otsailak 22) Valentziara bidaiatuko dute Lucas Fernandezenak, liderraren kantxan hirugarren garaipena jarraian lortzeko asmoz.
Argazkia: Lointek Gernika Bizkaia. Lointek Gernika Bizkaiak Valentzia Basket izango du aurkari zapatu honetan (otsailak 22), 19:15ean, Fontetan, Emakumezkoen Endesa Ligako 22. jardunaldian. Gernika-lumotarrak liderraren kantxa bisitatu beharko dute, baina azken bi garaipenak poltsikoratuta. Lucas Fernandezen taldea FIBA Leihoetako geldialditik “ahalik eta hobetoen itzuli” da, taldekideen hitzetan: garaipenekin. “Ez ziren batere errazak izan, Malostetik urrun jokatzea beti baita konplikatua eta euskal derbiek ere gogortasuna baitute ezaugarri”, gaineratu dute azken bi garaipenekiko.
Hala ere, azken unera arteko sufrimendu eta guzti, foru herrikoek bi garaipen garrantzitsu lortu zituzten playoff postuetan mantentzeko; iragan eguenan (otsailak 13), Celtan lortu zuten garaipena 54-57ko emaitzarekin. Domekan (otsailak 16) berriz, euskal derbia partikaratu zuten, IDK Euskotreni 71 eta 65 irabaziz. Lointek Gernika Bizkaiak nabarmendu du, alegia, garaipen bi horien esker, hamargarren sailkatuarekiko (Spar Kanaria Handia) “arrakala txiki bat” zabaldu dela.
Lointek Gernika Bizkaiak “inertzia positibo hori” aprobetxatu behar duela azaleratu dute, beregain: “Fontetako pista zaila beldurrik gabe bisitatu behar dugu. Valentzia Basket Emakumezkoen Endesa Ligako liderra da gaur egun, eta, gainera, 18 garaipen eta 3 porrot soilik lortu ditu”. Gauzak horrela, “galtzekorik barik” atera behar da taldea zapatuan, jokoan erregulartasuna erakutsiz. Izan ere, Valentzia Basket, oso tarte laburretan “kolpe hilgarriak emateko gai da”.
