Itzuliaren etapa bat Gernika-Lumon amaituko da, 26 urteren ostean
Pello Bilbaok berak parte hartu du apirilaren 11ko bosgarren etapako diseinuan. Antolatzaileek esan dute “ibilbide oso irekia” prestatu dutela aurtengoan. Apirilaren 7tik 12ra artean lehiatuko dute.
Gernika-Lumon eta Busturialdean txirrindularitza gogotik bizi dute. Lasterketa asko eta asko pasatzen dira inguruko herrietatik, eta orain Itzulia Basque Country lasterketaren etapa amaiera hartuko du Gernika-Lumok, 26 urteren ostean. Buesa Arenan hasiko da lasterketa, apirilaren 7an eta, ohi bezala, Eibarren amaituko da, 12an.
870,20 kilometroko ibilbidea izango dute aurretik munduko txirrindularirik onenek. Antolatzaileek adierazi dute ibilbidea “oso irekia” dela; lasterketa “azken egunera arte” erabakita ez egotea nahi dute. Ohartu dute, gainera, zenbait tranpa dituela: “Beraz, faboritoak erne ibili beharko dira, eta euren onena eman beharko dute”. Parte hartzeari dagokionez, “goiz da hitz egiteko, oraindik ez baitugu buletinik jaso, baina ziur gaude, etortzen direnak etortzen direla, ikuskizun bikaina izango dugula, lasterketa honetan ohikoa den moduan”. Aurtengo Itzulian, 23 mendate puntuagarri egongo dira: 1. kategoriako lau; 2. kategoriakoak, hiru; 3. kategoriakoak, hamasei. Helmugako hobariak izango dira (hamar, sei eta lau segundo) eta baita tarteko esprintetan ere (hiru segundo, bi eta bakarra).
Mattias Skjelmose Jensen, Carlos Rodriguez, Pablo Castrillo, Enric Mas, Aleksandr Vlasov edota Joao Almeida, besteren artean, irteera lerroan izango dira. Pello Bilbao bera ere bai. Hain zuzen, gernika-lumotarrak etxeko etaparen diseinuan parte hartu du. Apirilaren 11ko bosgarren etapa Urduñatik aterako da lehen aldiz. Lau mendate puntuagarri ditu: Las Campas, Sarasola, Aretxabalagane eta Errigoiti.
Morgatik sartuko da Itzulia Busturialdera, baina, behin murgilduta, izendatuta ez dauden beste hainbat muino igaro beharko ditu tropelak: Akorda edo Zallobante, adibidez. Bilbaok ondo baino hobeto ezagutzen dituen horiek. Etapa jostagarria izango da, eta gernika-lumotarrak berak begi asko izango ditu gainean. Kokapena “oso garrantzitsua” izango dela diote.
Gainontzeko etapei dagokionez, Buesa Arenatik atera eta Gasteizko kaleak zeharkatuko dituen 18,7 kilometroko erlojupekoa izango da lehenengoa. Bigarrena, luzeena, Iruñetik aterako da, ia 200 kilometroren ondoren esprintean amaitzeko aukera ugari dituena. Apirilaren 9koa, Zarautz eta Beasain artekoa, aurreikusi dute etapa erregina bezala; ez da oso luzea, 156 kilometro ditu, baina baita zazpi mendate ere.
Laugarren etapak Beasain eta Markina-Xemein lotuko ditu. Lehen etapa bizkaitarrak ere zazpi igoera izango ditu, bereziki nabarmentzekoa Izua izango da, 3,5 kilometro eta 10,6ko bataz besteko aldapagaz. Bosgarren etapa Gernika-Lumokoa izango da. Azken etapa, ohi bezala, Eibarren amaituko da, baina ez Arrateko santutegian, hirigunean baizik. Markina-Xemein eta Lea-Artibaiko errepideak zeharkatuko ditu, Trabakua bi aldiz igoz. Horrez gain, berritasuna da Gorlako mendatea kendu dutela, baina Krabelin, Karabieta edota Izua igaro beharko ditu lehen postuetan txapela jantzi nahi duenak.
Gauza jakina da ziklista garrantzitsu asko faltako direla. Iaz, Jonas Vingegaard (Visma), Primoz Roglic (Red Bull) eta Remco Evenepoel (Soudal) aritu ziren, baina aurten hiru horietako bakar bat ere ez da egongo lasterketan, ez baitute Itzulia egutegietan. Hiru txirrindulari horiek ez dute oroitzapen ona azken ekitaldiaz, beste hainbat ziklistarekin batera erori baitziren laugarren etapan, Oletako mendatea jaisten ari zirela. Hirurek proba bertan behera laga zuten.
